SI Cebu City Acting Mayor Michael Rama niasumer isip mayor sa syudad niadtong Sabado sa buntag, Nobyembre 20, 2021, usa ka adlaw human sa kamatayon ni Mayor Edgardo Labella sa alas tres sa kaadlawon niadtong Biyernes, Nobiyembre 19, 2021, sa panuigon nga 70 anyos.
Sa samang higayon, si Cebu City Councilor Donaldo “Dondon” Hontiveros, ang numero unong konsehal sa syudad, niasumer isip bise mayor. Si Rama nihurar atubangan ni Court of Appeals (CA) Cebu Associate Justice Gabriel Ingles, samtang si Hontiveros nanumpa sa iyang katungdanan atubangan ni Rama.
Si Rama nipahayag nga kinahanglan nga moasumer dayon silang duha ni Hontiveros isip mayor ug bise mayor aron kalikayan ang “hiatus” o kal-ang sa paghatod og serbisyo sa kagamhanan sa syudad. “It is very clear when death comes, succession follows. Otherwise, there will be a hiatus,” nagkanayon si Rama.
Ang nahitabo kang Rama ug Hontiveros sama sa nahitabo sa miaging tuig sa lungsod sa Barili sa habagatang kasadpan nga bahin sa lalawigan sa Sugbo sa dihang namatay si Barili Mayor Marlon Garcia sa edad nga 58 anyos niadtong Septiyembre 6, 2020.
Pagkasunod adlaw, Septiyembre 7, 2020, si Vice Mayor Julieto Flores ug Municipal Councilor Luisito Ponsica, ang numero unong konsehal, nanumpa sa ilang katungdanan atubangan ni Barili Regional Trial Court Judge Leopoldo Cañete isip mayor ug bise mayor.
Sanglit way makatag-an kon asa kutob ang kinabuhi sa usa ka tawo, ilabi na sa usa ka pinili nga opisyal sa lokal nga kagamhanan, kini hilantawan ug gipangandaman na sa atong balaod, ilabi na sa Republic Act No. 7160, ang Local Government Code of 1991.
Ang Section 44 niini nagkanayon, “If a permanent vacancy occurs in the office of the governor or mayor, the vice-governor or vice-mayor concerned shall become the governor or mayor.”
Kon permanente nga mabakante ang opisina sa gobernador o mayor, ang maong mga posisyon pagahulipan sa bise gobernador o bise mayor. Mao na nga nahimong mayor si Vice Mayor Mike Rama sa Cebu City ug si Vice Mayor Julieto Flores sa Barili sa dihang permanente nga nabakante ang puwesto sa ilang mga mayor tungod sa kamatayon.
Apan ang mahitabo, permanente na sab nga mabakante ang posisyon sa bise gobernador ug bise mayor.
Ang balaod midugang sa pag-ingon, “If a permanent vacancy occurs in the offices of the governor, vice-governor, mayor, or vice-mayor, the highest ranking sanggunian member or, in case of his permanent inability, the second highest ranking sanggunian member, shall become the governor, vice-governor, mayor or vice-mayor, as the case may be.”
Subay sa maong balaod, nahimong bise mayor sa syudad sa Sugbo si Konsehal Dondon Hontiveros, kay siya man ang numero unong konsehal sa 2019 elections. Samtang si Konsehal Luisito Ponsica, ang numero unong konsehal sa Barili, nahimong bise mayor sa maong lungsod. (edbarrita@gmail.com)