MAKALIBOG gyod ning nanghitabo karon.
Gusto sa uban nga dunay, matod pa, continuity kuno sa mga programa sa Duterte administration. Gusto nila nga kon mahimo, ang anak mismo ni Pres. Rodrigo Roa Duterte (PRRD) nga si Inday Sara ang mopadayon sa maong mga programa.
Ang problema kay laing tawo ang giduso ni PRRD nga maoy mosunod sa iyang mga programa, si Senador Bong Go. Buyno, daan pa sa sinugdanan, kanunay na gibalik-balik og sulti ni PRRD nga di siya gusto nga mag-presidente si Inday Sara.
Ang trabaho kuno og presidente dili bagay sa usa ka babaye, labi na kon anak niya.
Mao kini hinungdan nga nabahin ang grupo ni PRRD karon, grupo ni Senador Bong Go ug grupo ni Inday Sara.
Unya ang grupo ni Inday Sara nahilambigit na karon sa grupo ni Bongbong Marcos nga ka-kontra ni Senador Bong Go sa pagka-presidente.
Klaro na kaayo nga gikampanya na ni Inday Sara kagahapon sa Davao nga pasuportahan ang kandidatora ni Bongbong Marcos (BBM).
Pabor kining nahitabo karon sa mga kandidato sa oposisyon Mabahin o mabuak na ang kadaghanan sa supporters ni PRRD.
Ang bagang hut-ong sa mga botante nga misuporta sa kadaogan ni PRRD mabahin na sa duha ka grupo, grupo ni SBG ug grupo ni Inday Sara.
Mogawas nga dili na kauban si SBG ug si Inday Sara.
Ang pangutana – asa man kaha mosuporta ang kinadaghanan sa maong mga PRRD supporters kanhi – adto ba ni SBG nga maoy giduso ni PRRD o ni BBM nga maoy giduso ni Inday Sara?
Ikaduha, kinsa kaha kanila ni PRRD ug ni Inday Sara ang tuhoan sa mga tawo pinaagi sa pagsuporta sa ilang giduso nga kandidato pagka-presidente?
Dinhi sa lalawigan sa Cebu, kinsa kaha ang suportahan sa One Cebu ni Gobernor Gwen Garcia sa pagka-presidente?
Pwede nga si SBG kay kusog man ang suporta kaniya ni PA Sec. Mike Dino.
Pwede nga si BBM kay spokesperson mismo ni Inday Sara ang anak ni Gob. Gwen Garcia nga si Mayor Cristina Garcia-Frasco. Pwedeng si Manila Mayor Isko Moreno o si Manny Pacquiao.
Di pa mahibaw-an sa pagka-karon kay giklaro ni Gob. Gwen nga dili pa sila modeklarar sa ilang suportahan sa pagka-presidente.
Nasayod kita nga giilogan sa mga kandidato ang Cebu tungod sa solid nga boto niini nga sobra sa usa ka milyon.