Ang Cebu City Police Office (CCPO) ug ubang police offices sa Metro Cebu naalarma na sa pagsaka sa kaso sa gitawag nga ginagmayng krimen sama sa kawat, tulis, panglabni, panguot, pangilad ug uban pang hulga sa kaluwasan sa mga yanong molupyo.
Sa panahon sa lockdowns o estriktongrestrictions sa pandemiya sa Covid-19, hingpit kining napapas human sa pagkahipos sa kadaghanan.
Nikunhod usab pag-ayo bisan ang mga ngilngig nga kaso sama sa patay ug mga illegal nga kalihokan.
Ug mapasalamaton kita nga mihinayhinay na og lurang ang kaso sa Covid-19 ug gipaluagang ang restrictions ubos sa Alert Level 1 status, apan sa pikas bahin, makapasubo nga uban sa pagbalik sa pagtuyok sa ekonomiya mao ang pagsulbong sa ginagmayng krimen, lakip sa mga illegal nga kalihokan.
Napanglantawan na kini sa kapulisan sa dakbayan bahin sa pagbalik sa ginagmayng krimen, sama sa nag-viral sa social media nga usa ka call center agent gikuotan sa iyang bag dapit sa IT Park sa Barangay Lahug. Duna say pipila ka drayber sa taxi ang gitulis sa ubang dapit sa siyudad.
Si PLt. Col. Wilbert Parilla, deputy director for administration sa CCPO, niingon nga ang dili mominos 400 ka mga pulis nga nadestino sa pagbantay sa miaging eleksiyon, nabalik na sa naandang duty ug ipakatap labi na sa mga dapit nga sagad mahitabo ang krimen.
Dalaygon kini nga lakang sa kapulisan. Apan ang mga dautang elemento naniid o nagbantay lang usab sa lihok sa awtoridad. Mas maayo nga kita mismo ang maglatid sa atong seguridad. Dili magsalig sa kapulisan.
Pananglitan, kon molakaw, labi na kon gabii, igmat kanunay. Dili moagi sa awaaw o dili mobuwag sa grupo. Kini ug daghan pang pamaagi aron malikay sa krimen.
Uban sa pag-ampo, manginabuhi kita nga luwas ug malinawon.