ANG Lapu-Lapu City gi-monitor karon sa ulohang buhatan sa Department of Health (DOH) ug hayan ipailawom sa Alert Level 3 human sa Nobiyembre November 30 tungod sa nagkadaghang mga kaso sa Covid-19 cases sa dapit.
Apan sila si Mayor Junard “Ahong” Chan ug Dr. Maryjean Loreche, chief pathologist sa DOH 7 ug consultant sa Siyudad kalabot sa panglawas nakugang, kay sukwahi man kini sa ilang mga talaan.
Ang Dakbayan dunay ubos kaayong mga kaso sa nanglabay nga mga semana.
Si DOH Undersecretary Maria Rosario Vergeire nisulti sa usa ka press briefing sa Lunes, Nobiyembre 22, nga sila nakakita og positibong pagsaka sa mga kaso sa Covid-19 sa duha ka semana sa Lapu-Lapu City, kansang giila nga moderate risk sa Covid-19 ang siyudad.
“We have observed that metrics for Lapu-Lapu City may require escalation from Alert Level 2 to Alert Level 3,” matod ni Vergeire.
Ang Lapu-Lapu, uban sa mga dapit sa isla sa Sugbo, ubos sa Alert Level 2 hangtod sa Nobiyembre 30, 2021.
Ang data gikan sa DOH tracker nagpakita nga ang Lapu-Lapu City dunay 73 ka Covid-19 cases, sa Nobiyembre 21. Apan ang case bulletin sa DOH-Central Visayas, nagpakita lang og 52 ka active infections sa Dominggo.
Si Vergeire nitaho nga ang moving seven-day growth rate sa Lapu-Lapu City (November 8-14 versus November 15-21) naa sa -34 percent, diin dunay 1.04 moving average daily attack rate gikan sa November 15- 21.
Sa duha ka semana nga growth rate (October 25-November 7 versus November 8-21), hinuon, naa sa 27.69 percent, nga dunay 1.30 moving average daily attack rate alang sa Nobiyembre 8-21. Kini nagbutang sa Lapu-Lapu ubos sa moderate risk classification, matod ni Vergeire.
Ang bed utilization rate sa siyudad naa sa 54.35 percent, samtang ang mechanical ventilators utilization rate nagpabilin sa 52.94 percent sa Nobiyembre 20.
Ang regional intensive care unit (ICU) utilization rate naa sa 15.38 percent, samtang ang ICU utilization rate naa sa 0 percent.
“With these numbers, Lapu-Lapu City will be monitored if they need to be escalated to Alert Level 3 from Alert Level 2,” nagkanayon si Vergeire.
Siya nidugang nga dunay reassessments sa Alert Level System matag ika 15 ug ika 30 matag buwan, ug ang dapit hayan ma-deescalate human sa implementation period.
“However, escalations may be recommended if at all warranted,” siya nidugang.
DI MOSUGOT
Dili motugot si Lapu-Lapu City Mayor Junard Chan nga ipa-ubos ang dakbayan sa Alert Level 3.
“Di ta kaingon nga i-level three ta nila, low kaayo atong cases. Naa tay mga measure nga gihimo aron mapa-ubos pa atong kaso,” matod ni Chan sa dihang nahinabi sa SunStar.
Nahibulong si Chan sa data nga giluwatan ni Vergeire nga moabot ngadto sa 73 ang Covid cases sa Lapu-Lapu base sa Nobiyembre 21 nga talaan.
Kay lahi kini sa 52 ka active infections niadtong Domingo, Nobiyembre 21 kon basehan ang case bulletin sa DOH-Central Visayas.
Sumala pa ni Chan nga tag-usa lang ka digit ang mga kaso Covid nga natala sa dakbayan, gani niadtong Lunes, Nobiyembre 22 adunay usa nga nadugang.
“Mao bitaw na shock ko. Unfair sa LGU nga puwerting paningkamot, gani sa Cebu (Probinsiya) kitay pinakataas nga vaccination rate,” matod pa ni Chan.
Si Loreche, sa iyang bahin, nihulagway nga pre-mature ang pamahayag sa ulohang buhatan.
“I have the data here with me, for the past several days our new cases for Lapu-Lapu has really been almost zero, that’s for the average daily new cases,” pasabot ni Loreche.
Gipasabot ni Loreche nga ang Alert Level 3 status sama ra nga gipatuman og balik ngadto sa LGU ang modified enhanced community quarantine (MECQ).
“These are things that we really need to be careful and mindful of, considering that we are already in the new normal,” dugang pa ni Loreche.
ANTIGEN
Gipaspasan sa Siyudad ang pagpamakuna diin moabot na ngadto sa 49 porsiyento ang fully vaccinated, samtang anaa na sa 75 porsiyento ang single vaccinated o first dose.
Ikaduha mao ang pagmontar og antigen test booth sa mga establisemento alang niadtong mga dili bakunado nga mosulod, dili sila pugngan apan sa kondisyon nga mopa-ubos sa libre nga antigen test.
Adunay marshal nga tahasan sa Siyudad nga maoy mopahigayon og random check ngadto mga establisemento kon gituman ang kamanduan sa Siyudad.
Ikatulo mao ang pagdani sa uban nga magpabakuna pinaagi sa three-day vaccination campaign sa Nobiyembre 28 ngadto sa Disyembre 1.
Ang magpabakuna adunay dakong tsansa nga makadaog sa raffle. Buot makab-ot sa Lapu-Lapu ang 100 porsento nga rate nga mabakunahan ang kinabag-an.