POLICE officer nga giingong hubog giakusahang nanukmag ug nanion sa usa ka drayber ug duha ka mga menor nge helper, nasikop alas 3:10 sa hapon sa Martes, Nobiyembre 23, sa Sitio Lahug, Brgy. Poblacion, lungsod sa Medellin, amihanang Sugbo.
Si Patrolman Viance Lord Rosello, 32, dunay kapuyo, taga Sitio Baybay, Barangay Antipolo, Medellin, sakop sa Tabogon Police Station, gidakop tungod sa reklamo nga grave threats ug physical injury nga may kalambigitan sa Republic Act 7610 kun Special Protection of Children Against Abuse, Exploitation and Discrimination Act.
Ang mireklamo giilang si Carlito Algadepe, 31, taga Brgy. Calape, Daanbatayan, driver sa delivery truck ug mga kaubang lalake nga nag-edad og 16 ug 17 anyos.
Si Police Lt. Gerry Antopina, deputy police chief sa Medellin Police Station nga nahinabi sa Superbalita Cebu, nagkanayon nga ang mga biktima gikuyugan sa usa ka Alexander Velez sa police station aron pag-report kabahin sa gihimo ni Rosello.
Matod sa tulo nga sila gipangsumbag, gitiunag armas sa pulis nga ilang gihulagway nga hubog hinungdan nga dali silang mirespondi.
Sa ilang pag-abot, si Rosello nasikop na sa mga sakop sa Daanbatayan Police Station nga maoy nag-una sa pag-abot sa dapit.
Sila sila Police Senior Master Sergeant Alfredo Mandal, Patrolman Jerame Villanca sa Daanbantayan Police Station ingon man sila si Corporal Homer Lequigan ug Patrolman Randy Yurag ni-turnover kang Rosello ngadto sa Medellin PNP.
Way armas nga nakuha sa possession ni Rosello, kinsa naka civilian niadtong higayuna.
BUY-BUST KUNO
Sa imbestigasyon sa kapulisan, si Rosello dunay duha ka mga bersyon nga gihatag.
“Naka-inom siya. Ako gipangutana kabahin sa reklamo. Mitubag nga duna siyay gipahigayon nga buy-bust operation sa lugar. Target daw niya ning tulo (biktima). Unya ako pangutana kinsa kauban nimo, wala makatubag,” dugang ni Antopina
Gipangita sab nila kon asa iyang mga item o ebedensiya, nakuha sa operation niini, ingon man wala dayon mi-coordinate sa Medellin Police.
Gawas nga walay klaro nga tubag, nanimaho usab nga bino si Rosello, busa nasabot nila nga way buy-bust operation nga nahitabo.
Gipusasan nila ug gidala sa Medellin Police Station apan gipasabot sa iyang katungod ug sa balidong reklamo sa mga biktima.
Ang mga biktima gi-tambagan sa pagpa-medical check up sa tambalanan sa dakbayan sa Bogo.
Samtang si Rosello ilang gipa-medical sa Cebu Provincial Hospital sa Dakbayan sa Bogo isip kabahin sa standard operating procedure (SOP).
Gi-request sab nila nga ipaubos sa liquor test, apan way doctor nga ni-assist kabahin niini kay wala kini sa tambalanan sa Medellin ug Bogo.
Matod ni Antopina nga si Rosello nanghimakak sa pasangil batok kaniya.
Gikuhaan unta sa iyang habig sa Superbalita Cebu, pero mipadayag nga magpakahilom na lang siya.
Si Major Welther Grapa, hepe sa Medellin Police Station nga nahinabi sa Superbalita Cebu, nagkanayon nga dihang gipangutana niya si Rosello kabahin sa pasangil batok kaniya, nanghimakak sab kini nga nangulata ug nanion sa iyang armas.
Sumala pa niya nga si Rosello niangkon nga nakainom siyag gamay apan dili hubog kay birthday sa iyang pag-umangkon.
Sa pangutana kon nganong naabot sa nahisgutang lugar, si Rosello nibutyag nga manugat unta siyag isda sa nahisgutang lugar.
Mopalit unta siyag isda aron sugbaon sa birthday sa iyang pag-umangkon, apan nagkabangi sila ni Algadepe kay nasaghiran iyang motorsiklo.
Apan niinsister si Rosello nga wala siya manion og armas ug nangulata.
“Amo dayon gi-aksyunan kay mao man nay sulti sa mga biktima, gipangti-unan pa. Dili ta gustong dunay pulis mag-abusar,” sumala ni Grapa.
Subay ning pagsuwat, dunay naka-ong-ong nga settlement sa matag habig.
Si Grapa nagkanayon nga kon magkasinabot ang matag habig nga dili mopasakag kasong kreminal ang mga biktima, ilaha na kining katungod.
Sila sa Medellin Police mo-release kang Rosello kon di pasakaan og kaso sa tulo ka mga biktima.
Dugang ni Grapa nga sila sa ilang bahin sa Medellin police mihimo sa ilang trabaho pagpanalipod sa sibilyan.
Ang Tabogon Police Station na unya ang bahala sa pagpasakag kasong administratiba batok kang Rosello.
Si Rosello giingong na-assign sa police community relations.