NAKUTAW ang hunahuna sa katawhan sa patutsada nga giluwatan ni Presidente Rodrigo Duterte mahitungod sa kandidato pagka-presidente nga nag-druga. Kinsa kaha sa ila?
Gisulti ni President Digong human sa iyang pagpadayag nga hinay og pangutok ug huyang nga lider si Bongbong Marcos. Dili niya suportahan sa umaabot nga eleksiyon.
Iyang gipadagan ubos sa Pederalismo ng Dugong Dakilang Samahan pagka-presidente si Senador Christopher "Bong" Go.
Nangahas pagpangutana ang usa ka tawo nganong wala man gipadakop ni President Digong ang maong tawo sa gipatuman nga kampanya kontra druga o panahon sa Tokhang kon tinuod ang iyang gipanulti.
Nganong sa mga kabus, dali ra man sikupon samtang ang datu, gipasagdan sa ilang bisyo?
Nagbumirang na hinuon sa pangulo ang iyang mga pahayag ug nagpaubos sa iyang pagkatinahod kay lahi diay ang balaod sa mga datu, lahi sab sa mga kabus.
Luyo sa mga pagbatikos sa pangulo, daghan ang nagtuo nga si Bongbong Marcos ang ginapunting sa mga patutsada ni President Digong.
Nagdugang sa kalibog sa katawhan nganong gikontra man niya si Bongbong Marcos nga iya man gihatag ang pabor sa pagpalubong sa patay nga lawas sa kanhi pangulo nga si Ferdinand Marcos Sr. sa Libingan ng mga Bayani, butang nga wa mabuhat sa uban nga mga Presidente sa milabay nga mga dekada.
Gidunganan sa mga protesta aron paphaon ang pangalan ni Bongbong sa listahan sa mga kandidato pagka-presidente, mikusog man hinuon labi na sa ilang pag-uban ni Mayor Sara Duterte-Carpio nga iyang giduso pagka-vice president.
Daghan ang naglibog unsa ba gyud ang tinuod, kalaban o kauban?
Lisud basahon ang baraha ni President Digong sa natad sa eleksiyon.
Nahimong kulbahinam nga daw teleserye nga ang script writer lang ang nasayod unsa ang sunod nga mahitabo samtang ang tumatan-aw, usahay mohilak, mobati ug kahadlok, usahay malipayon ug puno sa pahiyom.
Hangtud dili pa mahuman ang eleksiyon, igo na lang sa pagpangutana ang katawhan: unsa man gyud kaha sila, tinuod ba nga magkalaban o kaha magkauban?