NANGAYO og pasaylo si Presidente Rodrigo Duterte ngadto sa mga Dabawenyo niadtong Martes, Nobyembre 23, 2021, tungod sa kakuwang sa mga proyektong inprastraktura sa iyang yutang nadak-an ubos sa iyang termino.
Si Duterte, atol sa iyang "Talk to the People Address" niadtong Martes, Nobyembre 23, nagkanayon nga daghan sa iyang konstituwente sa siyudad sa Davao nadismaya kaniya nga wala nagprayoridad sa pagpalambo sa mga pasilidad nga inprastraktura sa ilang yutang nadak-an ubos sa iyang administrasyon.
Matud niya nga dunay usa ka batang babaye kinsa nasuko kaniya human nga ang Davao way napupo ubos sa iyang paglingkod isip taas nga opisyal sa gobyerno.
Matud ni Duterte nga intensiyon niya nga mandoan ang iyang mga miyembro sa gabinete atol sa ilang unang tigum human siya makalingkod sa posisyon nga ibutang ang Davao sa pinakaulahi sa ilang prayoridad aron nga malikayan ang pagpanaway.
"Noong unang meeting namin sa Cabinet, ito sila, sinabi ko talaga sa kanila, unahin ninyo 'yung ibang lugar. Ipahuli ninyo ang Davao kasi taga-riyan ako. Sabihin nila, siyempre si Duterte Davao, taga-Davao, unahin niya ang Davao. That would be the natural consequence of the flow of reason of unreasoned people," pagtin-aw niya.
"So ang Davao hanggang ngayon, 'yan pa rin ang airport niya, masikip, lumiliit na, it be -- it has become terribly small because of the so many people using it," dugang pa niya.
Naglaum si Duterte nga ang sunod nga administrasyon magtukod og bag-ong airport alang sa Davao.
Gihimo sa Presidente ang pamahayag human niya susiha ang aviation ug maritime development projects sa General Santos City ubos sa Build, Build, Build Program sa gobyerno niadtong Lunes, Nobyembre 22.
Apil sa natapos nga mga proyekto sa General Santos City Airport mao ang ekspansiyon ug rehabilitation sa Passenger Terminal Building, instolasyon sa navigational aids ug pagkonstrak sa Administration Building.
Ang nasudnong kagamhanan nagkompleto sa konstruksiyon sa P104.4-million Port Operations Building, apil na ang konstruksiyon sa parking area, covered court, day care center, ug drainage system sa pantalan sa General Santos City. (SunStar Philippines)