TANGTANGAN sa senado og budget ang Philippine Athletics Track and Field Association (PATAFA) ug adto na kini ihatag sa Philippine Sports Commission (PSC) kon dili kini mohunong sa pagpang-harrass ni EJ Obiena, ang bugtong pole vaulter sa nasod.
Mismong si Senator Pia Cayetano maoy misugyot niini ngadto sa plenary diin gituki ang 2022 budget alang sa PSC niadtong Martes sa gabii, Nobiyembre 23, 2021.
Ang Senado, sa sayo pa, temporaryong mipugong una sa budget sa PSC tungod sa wa pagpakabana sa maong ahensiya kalabot ning maong issue sa panagbangi ni Obiena ug Patafa.
Giaprubahan sa Senado ang P364.24 million nga proposed budget sa PSC alang sa 2022 apan ubos sa kondisyon nga kinahanglan nga korehi-an una nila ang inhustisya nga gihimo ngadto ni Obiena.
“I want to let the PSC know and Patafa know that this budget season does not end even if we will now agree to grant the budget. We still have a few weeks and we will go through the process of amendment, and then we will pass this (budget) bill. And then we will go through bicam (bicameral conference committee),” ni Cayetano pa atol sa plenary budget deliberations.
Si Sen. Joel Villanueva, kinsa midepensa sa budget sa PSC, ug ingon man si Senate Majority Leader Juan Miguel “Migz” Zubiri, misuporta sa mosyon ni Cayetano.
Matod ni Villanueva nga ang PSC nasagmuyo sa nahitabo ug tungod niini hatagan nila og prayoridad ug importansiya ang mga atleta ilabi na ang mga national athlete.
Dugang pasabot ni Cayetano, kinsa usa usab ka atleta, nga bisan tuod og aduna nay panagbangi si Obiena ug Patafa, ang budget alang sa training sa mga atleta dili angay nga pugngan.
Ang kontrobersiya mitumaw sa dihang ang Patafa mipasangil kang Obiena nga napakyas sa paghatag sa suweldo sa langyawng trainer niini nga si Vitaly Petrov sa Ukraine sukad pa niadtong 2018.