NAGKUTOY ang akong tiyan human kog pamalit og tulo ka brip ug tulo ka T-shirt. Last day man sa payday sale sa SM Seaside adtong adlawa. Gitan-aw ko ang relo sa akong walang bukton. Alas tres na sa hapon. Misulod ko sa Bumble Bee ug milinya sa counter. Samtang nagpaabot ko sa akong turno, nasiklapan ko ang usa ka babaye nga nagkaon nga nag-inusara sa usa ka lamesa. Pamilyar nako ang iyang nawong. Kaila kami didto sa Manila diin ako nakatapos sa kursong Accountancy. Siya si Mildred, ang cheer leader sa cheering squad sa basketball team sa UE diin kami nagtungha. Matahom siya ug nindot pagkalalik ang bayhon sa iyang lawas. Sa among paghimamatay kaniadto nahibaw-an ko nga taga Dumaguete siya. Human kabayri ang cashier gidala ko ang trey sa hamburger ug iced tea sa lamesa ni Mildred.
“May I share this table, Ma’m?” matod ko nga mitutok kaniya.
“Yes, of course,” matod niya nga mitutok sab nako. “Uy, kaila ko nimo! Si Rudyard ka. What a small world!”
Nagkahimamatay mi pag-usab si Mildred. Nahisgutan namo ang among panagkaila didto sa UE isip mga estudyante sa Accountancy ug sa among panagsuod nga nahisangko sa panaghigugmaay. Nahinumdom ko nga human sa among gradwasyon nahisangko sab mi sa usa ka lawak sa motel diin gisaluhan namo ang katam-is sa gugma. Apan wa nako damha sa paglabay sa usa ka buwan si Mildred nipauli sa Dumaguete kay nagpakasal sa usa ka abogado nga iyang nauyab sa hayiskol pa sila.
“Nia lagi ka sa Cebu?” matod ko samtang nagpadayon kog kaon. “Pila nay inyong anak?”
“Usa ray among anak. Naa sa poder sa akong ginikanan. Tua na man si Robert. Three years ago, nabangga ang iyang awto sa poste kay nag-drayb bisag nakainom. Dead on the spot siya. Nia ko sa Cebu kay nagtrabaho ko isip internal auditor sa usa ka gas company dinhi.”
“Oh, how sad! Accept my belated condolences,” matod ko nga midunol sa tuo kong kamot nga iyang gidawat. Gipisil ko sa makatulo ang iyang palad.
“Ikaw, Rudyard, kumusta ka?” ni Mildred nga hugot mitutok kanako.
“Nia. Still a bachelor,” tug-an nako.
“Uy, kadaghang mga gwapa dinhis Cebu, wa gyud ka mabihag sa ilang kaanyag?” ni Mildred.
“Lagi. Nagpaabot lang ko sa higayon nga ikahibalag ko ang babaye nga himuon kong inahan sa akong mga anak,” matod ko nga nagtingsi.
Human namog pangaon mitindog si Mildred. “Sige, mouli na ko.”
“Asa ka nag-estar diri?”
“Naa sa Kings Apartment sa Mambaling.”
“Pwede mokuyog ko nimo? Gusto ko makatultol sa imong gipuy-an.”
“Okey.”
Nanggawas mi sa Bumble Bee ug nanakay og taksi. Sa sulod sa taksi gihunghongan ko si Mildred. “I still love the beautiful cheer leader. I want her to marry me.”
Mitan-aw si Mildred sa akong nawong ug mipahiyom. Unya midip-ig siya sa akong dughan. May gihunghong sab siya nako bahin sa iyang tinaguan kalabot sa iyang anak nga gililong niya kang Robert. Gihagkan ko ang iyang agtang ug giagbayan. (KATAPUSAN)