ANG Sugbo ang nailang Lechon Capital dili lang sa Pilipinas kundi bisan sa tibuok kalibutan ug samot pang nisikat nga gihatagan og bag-ong twist sa Cebu’s Original Lechon Belly (Colb)-- ang Boneless Lechon!
Ang mga artista ug celebrity nga gikan sa Manila nga nidayo pa aron lang makatilaw unsa ni kalami ang magpamatuod nga da best gyud ang lechon sa Sugbo.
Usa sa mga dili makalimtan ni Gladys Gochan sa chika niya sa Superbalita Laysho ang pagbisita ni Kris Aquino ug mga anak nga silang Bimby ug Josh nga nangaon sa ilang flagship store sa Parkmall.
Kauban pa nila ang managtrato niadto nga silang Erich Gonzales ug Daniel Matsunaga ug ang head writer sa iyang kanhi programang “Kris TV” nga si Darla Sauler.
Nahinangup usab si Gladys sa komedyanteng si “Mahal,” kinsa nitaliwan niadtong Agusto tungod sa Covid, nga usa sa mga nahimo nilang higala.
“Siaw kaayo si Mahal gipanuhot ko’g kinatawa. Nakakugos kog ahat niya kay nahadlok siya sa among iro nga huskie. Nikuyog siya nga nag-grocery ko, nahugyaw jud ang mga tawo sa Savemore tungod ni Mahal,” paambit ni Gladys nga tag-iya ug CEO sa Colb.
Karong bag-o lang sunodsunod ang mga sikat nga stand-up comedian sa Manila ang nahimo nilang kustomer sama nilang Ethel Booba, Tekla, Donita Nose, Pooh, Negi, Petite ug Boobsie Wonderland.
Niadtong kalagkalag bisita sab nila ang TV news anchor nga si Korina Sanchez kauban ang iyang crew. Ang magtiayong Marlon ug Gladys Gochan una nang na-featured sa Rated K ni Korina niadtong 2014.
“Daghan bitaw mangutana ngano kuno daghan ming mga suking artista. Wa gyud mi endorser. They simply love the boneless lechon experience.”
Nagpadayon sab ang ilang 10th Annual Spicy Boneless Lechon Eating Contest diin ang tanang weekly winners sa tanang branches ang magtigi sa final round karong Dec. 4 nga mokabat sa P25K ang premyo.
“Of course, padayon gihapon ang contest para di maputol ang nasugdan na. At least makatabang ta bisan ginagmay especially this pandemic. But we have to follow health protocols mao among giusab ang mechanics. Dili na magdungan og kaon ug through timer na,” ni Marlon nga maoy giilang innovator ug creator sa Boneless Lechon.
Nia ang pipila sa mga showbiz icon atol sa actual nga pagbisita nila sa Colb nga malipayong nagsaulog karon sa ilang ika-10 nga anibersaryo sa kalampusan!