MAGSUGOD karong adlawa, Nobiyembre 25, ang pagpamakuna kontra Covid-19 alang sa pediatric group sa dakbayan sa Danao.

Gipahibalo sa kagamhanan sa Danao, limitado sa 150 ka mga bata nga nag-edad og 12 ngadto sa 17 anyos sa unang adlaw sa pagpamakuna.

Ang bata kinahanglan nga ubanan sa ilang ginikanan o guardian sa vaccination site sa dakbayan.

Sa gusto nga magpabakuna, mahimong moduaw sa information office sa siyudad aron mahatagan og slot.

Mahimo ra hinuon nga ang parents o guardian sa bata maoy moduaw sa pagpalista sa bata.

Pasidaan sa kagamhanan nga kinahanglan nga mosunod ug motambong sa scheduled vaccination dates human wala gitugot ang substitution o replacement.

Gikinahanglan usab ang pagdala og kaugalingong ballpen, pagsul-ob og face mask ug face shield.

Alang sa mga dili makatambong tungod sa mga balidong rason sama kon naglain ang lawas, gimandoan sa pagpahibalo sa Resbakuna Team aron mahatagan dayon og laing schedule sa pagpabakuna.