DILI mominus P2.5 milyunes nga balor sa shabu nga nasakmit gikan sa duha ka mga tigpayuhot og gidiling drugas sa dalan F. Villa, Barangay T. Padilla, siyudad sa Sugbo atol sa pagpangronda sa mga operatiba sa Regional Police Drug Enforcement Unit (RPDEU) 7, pasado alas 10:00 sa gabii niadtong Martes, Nobiyembre 23.
Nadakpan mao sila si Allan Pestańo, 53, lumolupyo sa nahisgutang lugar ug Ma.Anafie Abrenica, 27, residente sa Barangay Lawaan 3, dakbayan sa Talisay.
Si Police Lieutenant Bonifacio Tañola, team leader sa RPDEU-7 , nangulo sa operasyon ubos sa kamanduan ni Police Lieutenant Colonel Ronnie Failoga, pangulo sa RPDEU-7, nakasakmit og 370 gramos sa shabu nga mobalor og P2.5 milyunes subay sa iyang street value base sa Dangerous Drugs Board (DDB).
Matud ni Police Lieutenant Colonel Failoga, ang ilang target sa pagronda mao si Abrenica apan naabtan usab nga naghatud si Pescaño og drugas ngadto sa suspek.
Dugang ni Failoga nga kining duha mahulagway nga regional high value target (RHVT) tungod sa ka kadako sa balor sa illegal drugs nga nasakmit gikan niini.
Si Pestaño, atol sa pakig hinabi sa Superbalita Cebu, niangkon hinuon sa iyang pagkalambigit sa paghatud og gidiling drugas.
Gawas kang Abrenica, duna pay lain nga hatagan si Pestaño. Siya magpaabot lang sa tawag sa iyang agawon nga wala lang una nganli.
Kasong kalapasan sa pagpamaligya ug paghupot og gidiling drugas ang atubangon sa mga dinakpan