GIBALHIN na sa city hall sa Miyerkules sa udto, Nobiyembre 24, 2021 ang haya ni Mayor Edgardo Labella gikan sa Cyrstal Palace alang sa public viewing.
Ang paghaya molanat hangtod sa Biyernes sa udto, Nobiyembre 26, sa di pa siya ilubong sa Golden Haven sa Barangay Binaliw, bukiran sa Cebu City.
Ipahigayon ang katapusang misa sa Cebu Metropolitan Cathedral sa dili pa ihatod sa kapahulayang dayon ang mayor.
Si Edgardo Labella II, nga mas naila nga Jaypee, kinsa nikandidato pagka-konsehal sa north district sa 2022 elections ug maoy eldest son sa mayor, nagpasalamat sa init nga suporta sa mga Sugbuanon hilabi na dihang naglaray sa kadalanan ang mga tawo atol sa pagbalhin sa haya sa iyang amahan sa city hall.
Matod pa sa batan-ong Labella nga nasubo og maayo ang ilang pamilya gumikan sa pagtaliwan sa ilang amahan apan nahupay ra usab ang ilang gibati gumikan sa pagduyog sa mga Sugbuanon sa kasakit nga ilang gibati.
Ang anak ni Edgardo nga si Jaypee niawhag sa mga Sugbuanon nga dili mo-kumpyansa ug mosunod gihapon sa mga health protocol atol unya sa ilang pagbisita sa ilang amahan hangtod nga kini malubong sanglit anaa gihapon ang presensiya sa Covid-19 bisan ubos na ang mga kaso.
HAPSAY RA
Pag balhin sa haya ni Labella gihulagway sa kapulisan nga hapsay ug wala silay nadawat nga problema.
Kapin sa duha ka libo ka mga tawo ang gibana-banang nag-atang sa karsada aron mohatag sa ilang katapusang respeto sa mitaliwan nga mayor sa dakbayan.
Takdo alas 11 sa Miyerkules sa buntag, Nobiyembre 24, 2021, nigikan ang haya sa mitaliwan nga mayor gikan sa Crystal Palace diin siya gi haya sulod sa lima ka gabii.
Giyayungan kini sa unom ka mga senior officers sa Cebu City Police Office isip pallbearers ug gi convoy dayon paingon sa city hall grounds.
Matod ni Police Lieutenant Colonel Wilbert Parilla, deputy city director for operations, nga wala silay nasugatan nga problema bisan kon nakamugna kini og gamay nga pagkalangan sa dagan sa mga sakyanan.
Pag-abot sa MJ Cuenco avenue atubangan sa simbahan sa Mabolo, nihatag usab og water salute ang mga sakop sa Bureau of Fire Protection (BFP) timaan sa ilang pag yukbo sa pagtaliwan sa amahan sa dakbayan. (PAC, AYB)