SUPERBALITA CEBU

Editoryal: Pugsanay sa pagpabakuna

Editorial Art by Ariel Itumay

GIKINANHANGHALAN na diay sa mga manrabaho onsite, kun moadto sa trabahoan nga bakunado sila. O bisan nakapabakuna silag ka usa unya duna silay schedule alang sa second dose. Tugtan ang di magpabakuna sa pag report, apan gikinahanglan ang matag karon ug unya nga swab test o antigen test. Ang mogasto mao ang kawani.

Bisan unsaon pag ingon nga way pugsanay sa pagpabakuna, apan kani nga lakang masusama ra sab ni og pugsanay, apan di lang kaayo klaro pagkasulti.

Tinuod, di ka pugson sa pagpabakuna, apan lisodlisuron ka man gihapon sa pagpa report sa trabaho pinaagi sa pagpagasto nimo sa swab o antigen test. Kinsa man kaha nga trabahante ang di mapugos sa pagpabakuna kon ingon niana ka hasol ang masinati aron lang makatrabaho?

Gawas sa kahasol, kadako sa magasto alang sa test nga kanunay pangayuon sa employer. Unya kon gamay ra kaayo og suweldo ang kawani, dako na kaayo ni og tibhang sa gamay kaayong kita sa usa ka kinsinas. Ang kwartang magasto sa test, makapalit na og nag-unang panginahanglanon.

Kon sundon sa tanang employers ang kamandoan sa kagamhanan nga kinahanglan bakunado ang mga kawani nga mo-report sa trabahoan. Busa, ning mosunod nga mga semana ug buwan, seguradong mapuno ang vaccination sites sa mga tawo nga kaniadto di magpabakuna, mapugos na pagpailawom niini aron di na mahasol sa pagtrabaho.

Mao ni ang paagi aron ang mga tawo mapugos sa pagpabakuna sa ingon makab-ot ang herd immunity nga maoy target sa kagamhanan sa di pa matapos ang Disyembre. Napugos na gud ang kagamhanan sa pagpahigayon og mga gimik aron lang pagdani sa mga tawo, sama sa pagpa raffle og house and lot, mga sakyanan ug uban pa.

Apan ning polisiya karon sa kagamhanan, nga di kuno pugsanay, daghan ang mapugos sa pagpabakuna kay kinsa bay gustong mahasol ug mogasto? Apan daghan usab ang manaway niini.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!