GIISYUHAN sa Games and Amusement Board (GAB) og cease-and-desist order ang Filipino Basketball League (Filbasket) tungod sa kakuwang og permit ug lisensiya niini sa pag-operate. Kini basi sa records sa professional sports and regulatory body.

Ang mando sa pagpahunong sa ilang operation gipitsahan niadtong Nobiyembre 12, 2021.

Ang Professional Sports Division sa GAB, sa ilang official report mitumbok nga ang maong lega nakalapas sa Presidential Decree No. 871, ang balaod nga naghatag og gahom sa GAB sa pag-supervise ug pag-regulate sa mga professional basketball.

Dugang sa taho nga ang Filbasket ubos sa hurisdiksiyon sa Joint Administrative Order nga gimugna ug gipahaom sa Philippine Sports Commission, Department of Health ug sa GAB kinsa maoy gitahasan sa paggiya sa mga sports activities taliwala ning nagpadayong krisis sa panglawas nga mugna sa coronavirus.

Ang maong lega bag-o lang mitapos sa ilang inaugural tournament nga mao ang Filbasket Subic Championships niadtong Lunes sa gabii diin ang AICC Manila maoy milangkat sa kampiyonato batok sa San Juan sa ilang best-of-three series nga gipahigayon sa Subic Gym sa Zambales.

Ang founder sa Filbasket ug director Jose Antonio Reyes miapelar sa directive sa GAB sa Office of the President sa Nov. 21 human kini makadawat sa maong cease-and-desist order niadtong Nobiyembre 18.

Sa taho sa GAB, ang Filbasket tournament usa ka professional sports competition nga nagkinahanglan og pagtugot gikan sa buhatan sa GAB.

Kini tungod kay ang mga participating teams nagbayad sa ilang mga players aron makasalmot sa kompetisyon.

Ang lagda nga gilatid sa GAB ug sa PSC nagkanayon; “Professional sports or competitions refer to individual or team sports, games, contests, bouts, tournaments or competitions where the participating athletes are paid or given other forms of compensation as salary or prize for participation.’’

Sa ilang bahin, ang Filbasket mipasabot nga ang ilang lega usa ka amateur league sama sa UAAP ug NCAA.

Kini mihimakak nga ang lega nagpaginansiya sa ilang lega kon dili igo ra kining naghatag og kapanginabuhian sa mga players, coaches, staff members, league officials ug uban pa.

Dugang niini nga ang pagpadagan sa torneyo gibasi ra usab sa DOH circular ug hinungdan nga didto ra kini makig coordinate sa regional office sa DOH.

Aron malikayan ang pagpahunong sa duwa, ang Filbasket miapelar sa maong issue ngadto sa Malacanang.