NASUBHAN si Mayor Junard “Ahong” Chan og kadaugan sa iyang pagsalmot sa 2021 Lapu-Lapu City Fiesta Tennis Tournament sa miaging gabii, Nobiyembre 24, 2021, sa Lapu-Lapu City Tennis Club.
Ang panagpares nila ni Chan ug judge Al Gomos ningmakmak sa panag-uban nila ni Verno Portcion ug Jorge Sarabia, 8-2, sa C+ doubles category.
Matod ni Chan nga wala sila magdahom nga makuha nila ang kadaugan gumikan kay nasugamak man sila sa kapildihan batok sa samang mga kaatbang atol sa ilang pag-ensayo isip preparasyon sa torneyo.
Gipasabot ni Chan nga gumikan sa kadaghan sa iyang gimbuhaton isip lider sa siyudad, dugay-dugay na siyang wala nakaduwa ug maayo lang kay nakakuha siya og oras alang ning maong kompetisyon ning higayuna.
“Katong practice game namo, gilupig mi nila pero nakabawos mi karon nga tournament na gyud. Seguro, pang-tournament lang ang among duwa,” batbat ni Chan dalang komedya.
Ang matag tuig nga torneyo nakatakda untang sugdan sa miagi pang buwan apan nauswag kini gumikan sa restriksyon nga adunay kalambigitan sa Covid-19.
Nasugdan ang torneyo niadtong Nobiyembre 22, 2021 human miluag ang restriksyon sa siyudad.