COTABATO CITY -- Impas ang kinabuhi sa usa ka construction worker, samtang tulo pa ka tawo ang naangol human nga gidaro sa depasaheroang van ang kabalayan daplin sa dalan alas 11:25 sa buntag niadtong Miyerkules sa Barangay Sapakan, Rajah Buayan, Maguindanao Province.
Ang namatay giila nga si Saidina Esmael, 42, minyo ug molupyo sa maong dapit, samtang ang mga naangol mao ang tulo ka pasahero sa van.
Matud ni Rajah Buayan Mayor Jack Ampatuan nga kusog kaayo ang dagan sa van ug pag-abot sa likuon nga kalsada sa Brgy. Sapakan wa na makontrola sa drayber ang manobela hinungdan nga gidaro niini ang kabalayan daplin sa kalsada.
Patay on the spot si Esmael nga nagduyan atubangan sa iyang balay kay nagpahulay gikan sa trabaho.
Mga naangol nga pasahero daling gitabangan sa mga molupyo sa dapit ug gihatud ngadto sa balay tambalanan.
Hinuon, boluntaryo nga misurender ang drayber sa van ngadto sa kapulisan.
Nagpasidaan si Ampatuan sa mga nagmaneho og sakyanan nga mag-amping ug maghinay-hinay sa pagpadagan ilabi na sa mga dapit nga daghan ang mga namuyo sa daplin sa dalan.