SUPERBALITA CEBU

Lubong ni Labella posibleng makamugna og huot nga trapiko

ADUNA ka bay mga importanteng lakaw karong hapon sa north district karong hapon unya mosakay ka og de pasaheroan o pribadong sakyanan?

Labing maayo nga imo na kining buhaton karong buntag aron dili ka matanggong posibleng kahuot sa dagan sa mga sakyanan gumikan sa paghatod sa patay nga lawas ni Mayor Edgardo Labella didto sa Golden Haven sa barangay Binaliw.

Si Konsehal Dave Tumulak, point person sa pamilyang Labella maoy niawhag sa mga tawo aron dili sila maapektohan sa kahuot sa trapiko gumikan sa presensya sa daghang mga sakyanan nga maoy maghatod sa mayor.

" Mangayo nalang ming daan og dispensa sa mga motorista nga maagian ning mga dalan nga akong gihisgotan ug kon aduna silay mga importante kaayong lakaw, mohangyo lang mi nila nga mogikan sila og sayo para dili sila maapektohan niining kahuot sa dagan sa trapiko nga maagian sa rota sa paglubong ni Mayor Labella." Matod ni Tumulak.

Alas 11 sa buntag igikan sa Cebu City Hall ang patay nga lawas sa mayor paingon sa Cebu Metropolitan Cathedral diin ang mga sakop sa Philippine Navy maoy moalsa sa lungon sa mayor ug ilakaw paingon ngadto sa simbahan.

Ang katapusang misa ipahigayon didto sa Cathedral nga sugdan alas 12 sa udto ug gikatakdang mahuman 1:20 sa hapon nga ihatod di mominos 100 ka sakyanan ug gatusan ka mga motorsiklo.

Ang Philippine Army personnel na usab ang moalsa sa lungon sa mayor paingon sa flad bed truck nga naghuwat sa gawas sa simbahan nga maoy mohatod paingon sa Binaliw nga manukad sa dalan P. Burgos ug mosubay paingon sa D. Jakosalem ug moliko sa Colon street paingon sa Osmeña Boulevard lahos paingon sa dalan Escario lahos sa Archbishop Reyes padayugdog ngadto sa Banilad-Talamban road paingon sa Pit-os hangtog sa menteryo.

Ang final viewing ipahigayon didto sa Golden Haven diin si Labella hatagan og full military honors kinsa maoy labing unang local chief executive sa dakbayan nga nitaliwan samtang anaa pa sa katungdanan. (PAC)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!