MOKANTIDAD sa P328,800 sa gituohang shabu ang nakumpiska sa kapulisan gikan sa usa ka 40-anyos nga drug pusher atol sa buy-bust operation niadtong Miyerkules sa hapon, Nobyembre 24, didto sa Bonguyan, Barangay Matina Aplaya, Davao City.

Giila sa kapulisan ang suspek sa mga alyas Mark Lopez ug alyas Kuya, minyo, residente sa NHA, Bangkal, siyudad sa Davao.

Sumala sa Regional Special Operation Group-Regional Police Drug Enforcement Unit (RSOG-RPDEU)-Davao nga gipangunahan ni Police Lieutenant Colonel Ronald Lao, dugay na nilang gipanid-an ang ilegal nga lihok sa suspek hangtud nga nakig-transak na kini sa awtoridad aron mobaligya og druga.

Sa miaging tuig nasikop na ang suspek sa samang kalapasan diin nakagula kini sa prisohan niadtong Pebrero, apan mihimo na sab sa susamang ilegal na aktibidad.

Mitimbang sa 20.55 gramos nga gituohang shabu ang nakuha gikan sa posisyon sa dinakpan nga dunay street value nga P328,800.

Giandam na ang pagpasaka og kaso batok sa suspek didto sa korte.