KASONG reckless imprudence resulting in serious physical injuries and multiple damage to properties ang atubangon sa usa ka drayber sa tanker truck human niini gipangdaro ang mga sakyanan lakip ang magtiayon nga sakay sa motorsiklo.

Alas 10:20 kagahapon sa buntag, Huwebes, Nobyembre 25, giingon nga nawad-an og kontrol ang water tanker nga gimaneho ni Alex Nartea samtang nagdagan sa Carlos P. Garcia Highway, Diversion Road, gikan sa Norte nga bahin paingon sa South bound diin nabanggaan niini ang kotse nga Honda Civic, motorsiklo ug tricycle.

Sa kakusog sa impak, kritikal ang kahimtang sa magtiayon nga taga Tinago Village, Matina Pangi, Davao City human nga naangin sa disgrasya sa Guadalupe Village, Barangay Matina Pangi.

Subay sa imbestigasyon, migula nga sakay sa motorsiklo ang magtiayong sila Jonathan Carmina ug Cleofe Carmina dihang naapil sila sa disgrasiya.

Nasayran nga nawad-an og kontrol ang drayber sa trak, diin apil sa mga nabanggaan ang nag-park nga usa ka Bongo truck, Isuzu Elf ug Isuzu Dropside.

Dali sab nga gidala ngadto sa Southern Philippines Medical Center ang magtiayon aron matambalan samtang ang drayber sa trak gikustodiya sa kapulisan sa Talomo police.