MIHIMO na gyud og hugtanong lakang ang kagamhanan aron ma-pressure o mapugos ang katawhan nga magpabakuna. Bisan si Presidente Rodrigo Duterte morag nahubsan na og pa-ilub, nimando na sa pribadong mga kompaniya nga dili pasudlon sa ilang trabaho ang mga empliyado kon way bakuna. Ang Department of Labor and Employment (Dole) mi-usab na sa ilang baruganan kabahin sa pagtratar sa mga empliyado nga dili bakunado.
Sugod karong Disyembre 1, dili tuod tangtangon ang mga empliyado nga dili bakunado, patrabahoon lang gihapon apan pangayoan og RT-PCR o rapid antigen test result matag duha ka semana nga ilang kaugalingon nga gasto. Kon mo-absent, i-charge sa ilang leave. Kon nahurot na ang leave, no work, no pay na. Aw, kon mao ning kalakiha, morag mapugos na ang mga empliyado sa pribadong sektor nga magpabakuna. Mahulog na ni nga ‘walay pugsanay apan walay balibaray.’
Sugod kagahapon, ang Lapu-Lapu City midili na pagpasulod sa mga tawo nga dili bakunado sa malls ug mga establisamento nga nagbase sa dakbayan. Kadtong dili bakunado, gikinahanglan nga ipa-ubos sa rapid antigen test nga gimuntar sa malls mismo. Ang katuyuan niini mao ang pag-awhag sa wa pay bakuna nga magpabakuna na o aron kapanalipdan ang mga bakunado nga di makasagol-sagol sa mga dili bakunado.
Kini nunot sa lakang sa kagamhanan nga mabakunahan ang tanan. Wa nay problema sa supply sa bakuna, busa wala nay igong rason nga dili mabakunahan ang tanan. Daghan na ang nagpa-abot nga moabot ang higayon nga mopinig o modapig kita sa grupo sa mga bakunado kay sa dili bakunado sa pagpasulod sa mga tindahan, trabahoan, eskuwelahan ug ubang mga lugar.
Atong sabton nga gihimo na sa gobiyerno ang tanan pagkumbinsir sa mga wala pa magpabakuna nga magpabakuna na. Atong paabuton kon kining hugot nga pagpamugos mosangpot na ba sa pagsaka sa gidaghanon sa mga magpabakuna kay kon hinay gihapon ang pagsaka sa mga bakunado, aduna gyuy problema sa vaccination program. Ngano man nga daghan pa man ang dili gustong magpabakuna? Kuwang kaha sa inpormasyon ang mga tawo o gumikan ba gyud kaha sa walay pagsalig sa bakuna? (bobbygnalzaro@gmail.com)