KADAGHAN na kita makadungog niining pagpangabuso sa coastguard ug militia sa China batok sa Pilipinong mananagat sa West Philippine Sea. Kadaghan na nila hasia ang atong mga mananagat ug gibanggaan pa gani ang usa sa atong banca nga nanagat sa dapit. Mahunong lang kining ilang pagpanghasi kon moreklamo na ang atong gobiyerno pinaagi sa diplomatic protest apan mousab ra gihapon sila.
Dunay usa ka barko sa Philippine Navy, BRP Sierra Madre, nga gituyo og pasangad sa atong gobiyerno aron himuong estasyonan sa Marines sa Ayungin (Second Thomas) Shoal niadtong 1999. Pagahatdan lang og rasyon nga pagkaon ug mainom ang Marines nga nagbantay sa maong barko.
Apan niadtong usang semana sa dihang duha ka supply boat sa Pilipinas nga nagdala og rasyon ug materyales alang kanila gibombahan og tubig sa tulo ka mga barko sa Chinese coastguard mao nga mibalik na lang sila sa agi. Paglabay sa hapit usa ka semana human nagkaestorya sila si Defense Secretary Delfin Lorenzana ug Chinese Ambassador Huang Xilian, nahatdan ra og rasyon ang Sierra Madre apan diha gihapoy nag-rubber boat nga sakop sa Chinese coastguard nga nagkuhag hulagway sa gihimo sa mga Pilipinong nagdiskarga sa mga rasyon. Kining maong dapit apil sa exclusive economic zone (EEZ) sa Pilipinas. Nidaug na kita niini sa Permanent Court of Arbitration sa The Hague niadtong 2016.
Niadtong Sabado, si presidential candidate Panfilo “Ping” Lacson sa Partido Para sa Demokratikong Reporma, mibisita sa Pag-asa (Thitu) Island aron mokonsulta sa mga lumolupyo sa maong dapit, apil na ang mga mananagat ug sa mga sakop sa Armed Forces of the Philippines Western Command. Kuyog sa private plane nga iyang gisakyan sila si Reporma president ug kanhi house speaker Pantaleon Alvarez, kanhi Philippine National Police chief Guillermo Eleazar, Reporma secretary general ug Davao del Norte Gov. Edwin Jubahib, ug ang Reporma spokesperson Ashley Acedillo.
Sa dihang diha na sila sa tungatunga sa kadagatan, nakadawat sila og tawag sa radio nga “You are approaching our military zone. Please stay away from the area and leave immediately. Your actions are unfriendly and dangerous.” “This is the Chinese Navy. You are approaching our military alert zone. Leave immediately in order to avoid misjudgment,” dugang sa radio message. Ang duha ka mga piloto nga sila si Capt. John Donguines ug Geo Villacasin kalmado ra kaayong mitubag sa gitudlo kanila sa AFP. Suma ni Lacson nga pag-abut nila sa Pag-asa nakadawat siyag text message nga “Welcome to China.”