SUPERBALITA CEBU

Editoryal: Nalab-anan ang gibuhat

Editorial Art by John Gilbert Manantan

SI Mayor Michael Rama nagsige og ingon nga “I won’t rock the boat” kun wa siyay tandugon sa City Hall. Magpabilin ang tanan sukad sa pag-leave ni Mayor Edgardo Labella. Wa siyay hilabtan bisan usa.

Apan samtang gihaya pa si Labella, nanumpa gilayon sila si Rama ug Bise Mayor Donaldo “Dondon” Hontiveros.

Ning semanaha, samtang gihaya pa ang mayor, nipahibawo si Rama nga di na pareporton una sa ilang trabaho ang coterminous nga mga opisyal nga tinudlo ni Labella.

Samtang gibiyahe ang haya ni Labella paingon sa city hall, nagpatawag og presscon ang mayor. Unta, ang angay niyang gibuhat mao ang pag-andam alang sa pagsugat sa haya sa namatay niyang mayor.

Unya moingon ang mayor nga “I won’t rock the boat.” Labaw pa sa rocking the boat ang iyang gihimo. Ambot nakaamgo ba kaha siya nga ang iyang mga lakang mahisama sa kakuwang og respeto ni Labella ug sa pamilya. Lahi ang iyang gipangsulti sa iyang actions. Naa ra bay giingon nga “actions speak louder than words.” Mas makita ang tinud-anay nga pagbati diha sa lihok, wa sa gipanulti. Lahi ang iyang gisulti sa iyang gibuhat.

Sa pulitika, matan-aw dinhi nga dunay liki ang kampo ni Rama tungod sa iyang gibuhat sa mga tawo ni Labella. Mao ni ang mosantop sa huna-huna sa tawo nga nagbasa sa iyang mga lihok. Magtuo ang publiko nga di tinuod nga “strong as ever” ang kampo.

Unta, gihuwat ni Rama nga malubong ang haya ni Labella una pa siya nihimo og dugang mga lakang. Igo na tong nanumpa sila ni Hontiveros aron pag-asumer sa katungdanan. Wa na unta niya dugangi.

Ning iyang gibuhat, nalipay ang ilang mga kaatbang sa pulitika kay sinyales man kini sa di maayong kahimtang sa usa ka organisasyon. Kay seguradong di malipay ang mga kaalyado ni Labella nga kauban karon ni Rama sa 2022 elections.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!