Magtiayong German, Pinay gitulis, gipatay

GERMAN national uban sa iyang asawa nga Pinay napalgan nga gibatobatoan ug gihiktan ang mga tiil nga napalgan alas 6:30 sa buntag sa Huwebes, Nobiyembre 25, sa kadagatan sa Barangay Maño, lungsod sa San Remigio, amihanang Sugbo.

Nagsugod na sa pagkadugta ang mga lawas nila ni Joseph Hans Wind, 69, German national, ug iyang Pinay nga asawa nga si Zenaida Buenaventura Wind, 62, taga Purok Molave, Barangay Maño, San Remigio, amihanang Sugbo.

Si Major Ian Macatangay, hepe sa San Remigio Police Station nga nahinabi sa Superbalita Cebu, nagkanayon nga ang mga biktima gitulis una gipatay, dayon gitambog sa dagat.

Sumala pa ni Macatangay nga usa ka mananagat maoy nakakita sa duha ka mga lawas nga milutaw sa hunasan.

“Hunas man niadtong higayuna mao nga nakit-an ang mga biktima. Unya ang ilang duha ka mga tiil gipanghiktag pisi, gibatobato-an aron dili molutaw,” paghulagway ni Macatangay.

Ang mga biktima giila sa ilang on call helper nga si Cheryl Aton Lombao base sa ilang gisul-ob nga sinena, body profile ingon man sa ariyos nga gisul-ob ni Zenaida.

Si Macatangay nibutyag nga tulis ang motibo sa kremin kay gi-ransack ang balay sa magtiayon nga daw sa naagian og bagyo.

Nangawala ang ubang mga butang, nagkatag tanang gamit sa panimalay.

Nagtuo ang kapulisan nga naa ra sa dapit ang mga killer kay klarong suhito sa palibot sa balay.

“Murag duna silay gipangita nga importanting butang, ingon man grabi sab ang kasuko kay brutal kaayo ilang gihimo,” sumala ni Macatangay.

Sa initial nilang pagsubay uban sa Scene of the Crime Operations (SOCO) 7, didto mi-agi ang mga killer sa likod sa balay.

Human makasulod, gihimo nila ang kremin, gipamusil ang magtiayong Wind.

Kay taob man, nagdala kinig bangka nga ilang gikargahan sa magtiayon ug gibatobato-an ang mga lawas paglabay sa dagat.

Ang panimalay sa magtiayon daplin sa dagat ug didto mapalgi ang mga lawas mga 300 metros gikan sa likod sa balay kay nigimaw tungod sa hunas.

Nagtuo si Macatangay nga gabii o kadlawon gihimo ang kremin.

Walay nakadungog sa buto sa armas bisan kon 50 metro’s ang gilay-on sa pinakaduol nga silingan.Gikan sa highway sudlonon og mga 100 metros ang balay sa mga Wind.

Naay CCTV camera ang panimalay sa mga biktima ug gipanghinaot nila nga makakuha silag dugang kalamboan sa kaso sanglit gi-prosiso pa sa Soco ang crime scene ug mga ebidensya.

Gawas niini dunay kabhang sa armas nga nakit-an sa sulod sa panimalay.

Sutaon sab nila ang mga background sa mga biktima kon unsa sila sa ilang lugar.

Ang ilang anak nga adopted toa sa Germany hinungdan nga ang magtiayon ray nagpuyo sa ilang panimalay.

Ang kabanay sa mga biktima ila sab nga gipaabot aron ma-account ang mga nawala nga butang.

Dugang ni Macatangay, nga mi-request na siya sa ilang headquarters sa Cebu Police Provincial Office (CPPO) alang sa pag-umol og task group nga maoy motutok sa kaso.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph