KON aduna kay importanteng mga lakaw sa Biyernes sa hapon, Nobiyembre 25, agi sa Bantal Road, sayo paggikan kay seguradong moungot ang dagan sa trapiko.
Labing maayo nga imo na kining buhaton karong buntag aron dili ka matanggong sa posibleng kahuot sa dagan sa mga sakyanan gumikan sa paghatod sa haya ni Mayor Edgardo Labella didto sa Golden Haven sa barangay Binaliw, bukirang dapit sa Dakbayan sa Sugbo.
Si Konsehal Dave Tumulak, point person sa pamilyang Labella, maoy niawhag sa mga tawo aron dili sila maapektohan sa kahuot sa trapiko gumikan sa presensya sa daghang mga sakyanan nga maoy maghatod sa mayor.
“Mangayo na lang ming daan og dispensa sa mga motorista nga maagian ning mga dalan nga akong gihisgotan ug kon aduna silay mga importante kaayong lakaw, mohangyo lang mi nila nga mogikan sila og sayo para dili sila maapektohan niining kahuot sa dagan sa trapiko nga maagian sa rota sa paglubong ni Mayor Labella,” matod ni Tumulak.
Alas 11 sa buntag igikan sa Cebu City Hall ang haya sa mayor paingon sa Cebu Metropolitan Cathedral diin ang mga sakop sa Philippine Navy maoy moalsa sa lungon sa mayor ug ilakaw paingon ngadto sa simbahan.
Ang katapusang misa ipahigayon sa Cathedral nga sugdan alas 12 sa udto ug gikatakdang mahuman ala 1:20 sa hapon nga ihatod di mominos 100 ka sakyanan ug gatusan ka mga motorsiklo.
Ang Philippine Army personnel na usab ang moalsa sa lungon sa mayor paingon sa flat bed truck nga naghuwat sa gawas sa simbahan nga maoy mohatod paingon sa Binaliw.
Manukad sa dalan P. Burgos ug mosubay paingon sa D. Jakosalem ug moliko sa Colon street paingon sa Osmeña Boulevard lahos paingon sa dalan Escario, lahos sa Archbishop Reyes avenue padayugdog ngadto sa Banilad-Talamban road paingon sa Pit-os hangtod sa sementeryo.