SA pagdasig sa mga Sugbuanon nga magpabakuna kontra coronavirus disease 2019 (Covid-19), si Cebu Governor Gwendolyn Garcia nimando sa tanang local chief executives sa paghatag og insentibo atol sa National Vaccination Days, Nobiyembre 29 hangtod sa Disyembre 1.
Si Garcia nilagda sa memorandum sa pag-awhag sa mga mayor sa lungsod ug siyudad lakip sa mga barangay kapitan sa pag-awhag sa ilang konstituwente sa pagpabakuna.
Sa maong higayon, mohatag og duha ka kilong bugas ang Kapitolyo ug usa ka buwan nga supply sa supplements sama sa Vitamin C nga dunay Zinc ug Vitamin B Complex alang sa matag indibidwal nga mabakunahan.
“The incentives shall be provided until supplies last,” saysay sa memorandum ni Garcia.
Ang kagamhanan gikatakda nga mopahigayon sa lapad nga vaccination drive sa naasoyng mga petsa subay sa tumong nga mabakunahan sulod sa tulo ka adlaw ang moabot sa 15 milyunes ka mga Filipino batok sa Covid-19.
Ubos sa Proclamation No. 1253, ang tanan nga mga empleyado o trabahante sa gobiyerno o pribadong sektor nga mosalmot sa vaccination drive dili ma konsiderar nga absent sa trabaho, apan kinahanglan lang niini nga ipakita ang vaccination certificate o vaccination card pagpamatuod nga nagpabakuna kini hinungdan nga wa makatungha sa trabaho.
Si Presidente Rodrigo Duterte nimando sa mga lokal nga kagamhanan nga mo-mobilize sa tanan nga resources, stakeholders, health human resources, ingon man sa mga konstituente niini.
Gimandoan usab niini ang Department of the Interior and Local Government (DILG) ug Department of Health (DOH) nga mangulo sa pagpahigayon sa “Bayanihan, Bakunahan” National CovidD-19 vaccination.
Base sa datos sa Visayas Vaccination Operations Center (VVOC) sa November 22, moabot sa 1.3 milyones ka mga indibiduwal lukop isla sa Sugbo lakip ang dakbayan sa Sugbo, Lapu-Lapu ug Mandaue ang kompleto nang nabakunahan kontra Covid-19.
Sa maong datos 40 porsiyento o moabot sa 563,317 niini gikan sa probinsya.
Tinguha karon sa kagamhanan nga mabakunahan ang moabot sa 3.5 ngadto sa 3.6 ka milyon ka mga residente sa tibuok lalawigan sa Sugbo aron makab-ot ang herd immunity.