DUL-AN sa upat ka milyon ka pesos nga balor sa tambal ug wheelchairs ang gidonar sa Philippine Charity Sweepstakes Office (PCSO) sa 81 ka mga barangay sa dakbayan sa Sugbo ug sa mga silingang lugar sa isla sa Sugbo.
Nangunay ang general manager sa PCSO retired Police Colonel Royina Garma sa paghatag sa mga tambal ug wheelchairs kagahapon, Nobiyembre 25, sa Cebu City Police Office (CCPO).
Matod ni Garma, mokantidad ang tanan sa P3.6 milyunes diin gikan kini sa kita sa lotto, swertres ug sa small town lottery (STL) ang gipamalit sa maong mga tambal lakip na ang wheelchairs.
Daghan sa mga kabus nga Sugboanon sigun ni Garma gumikan sa pandemic maglisud na sa pagpalit og maintenance sa ilang sakit nga tungod niini nakig alayon siya sa STL Foundation nga mahatag kini sa mga barangay sa Sugbo.
Nanghinaot ang PCSO general manager nga mahatag gyud sa mga barangay official sa labing kabus nga molupyo ang tambal ug wheelchairs.
Gawas sa mga tambal, mohatag usab ang PCSO ug pundo sa Cebu City Medical Center (CCMC) balor sa P500,000 sugod sa Enero 1, 2022 ug tulo ka milyon ka pesos matag buwan sa Malasakit Center sa Vicente Sotto Memorial Medical Center (VSMMC).
Gitinguha usab niya nga sa sunod buwan maabot na ang ilang gipalit nga 300 ka ambulansya nga ipang-apud-apod sa mga publikong tambalanan tibuok nasud.
Gibutyag ni Garma nga gipadali nila ang paghatod niini aron dili moabot sa election period apan dili gyud kini madala tungod sa kadaghan sa ilang gipalit nga ambulansya.
Dinhi sa Sugbo daghang publikong tambalanan ang makadawat sa brand new nga ambulansya gikan sa ilang ahensya.