USA ka kawani sa Cebu city hall nga giingong nangilkil sa mga tag-iya og stalls sa merkado publiko sa Carbon aron makakuha sila og slot sa gimodernong merkado ug sa gibuhat nga interim market, nasikop sa entrapment operation sa National Bureau of Investigation (NBI) 7 sa Miyerkules sa hapon, Nobiyembre 24, 2021 sa Freedom Park, Dakbayan sa Sugbo.
Ang suspek giilang si Kara Marie Arcilla-Bargamento, administrative aide III sa Cebu City Hall, in-charge sa Market Operations Division (MOD).
Matod sa opisyal nga pamahayag sa NBI 7, sila nakadawat og reklamo batok kang Bargamento.
Ilang gipanid-an ang buhat ni Bargamento, kinsa giingong nigamit sa iyang buhatan sa pag-request, modawat ug nakabenepisyo sa transaction isip OIC sa MOD ug sa mga vendor sa Freedom Park market ug Warwick Barracks market.
Human niini, ilang gipahigayon ang entrapment operation, diin siya nasakpan sa undercover agents human siya nidawat og marked-money gikan sa vendor nga nireklamo.
Nakuha gikan kaniya ang daghang Certificate of Rights kalabot sa stalls relocation building ug sa gimodernong Carbon market.
Giingong nangayo si Bargamento og tag P100,000 matag vendor alang sa “prime location” sulod sa merkado.
“The payment will secure them a space in the soon to be opened interim market for vendors who wanted to relocate and it would also guarantee the availability of a space, promised to be in a prime location inside the redeveloped and modernized Carbon market,” matod sa NBI.
Si Bargamento mao ang naghikay sa pag-isyu og Certificate of Award nga naghatag og rights ug right of occupancy sa apektadong vendor.
Matod sa NBI nga base sa sworn statements nila ni Market supervisor Marigen B. Diano ug Probe officer-in-charge Raquel Arce nga 50 na ka mga vendor ang gika-transact ni Bargamento.
Gipasakaan na siya sa NBI 7 og kasong kalapasan sa Republic Act 3019 kun Anti-Graft and Corrupt Practices Act human sa inquest proceedings.
NASAYOD
Gipahibawo ni Arce, hepe sa Prevention Restoration Order Beautification Enhancmement (Probe) kinsa maoy gibutang ni Mayor Michael Rama isip overseer sa Market Operations Division, nga nakadungog siya og mga taho nga adunay gihimong binuang sa usa ka kawani apan wala siya motuo.
Hangtod nga usa ka vendor nibarog ug andam mo-testify kabahin sa giingong pangwarta.
Ang vendor gidala sa market personnel ngadto sa buhatan ni Arce kinsa maoy nagdumala sa merkado gikan niadtong 2007-2016.
Matod pa ni Arce nga ang vendor nakakuha og ebedinsya gikan sa gihimong video call uban ni Bargamento nga maoy in-charge sa Freedom Park ug Warwick Barracks nga sakop sa Carbon Market.
Ang dinakpan regular employee sa Cebu City Hall nga nadestino sa Office of the City Markets niadtong 2019 sa dayong human sa first term ni kanhi Mayor Tomas Osmeña.
Si Bargamento unang nasulod isip casual niadtong 2016, dugang sa overseer.
Gitug-an ni Arce nga base sa kuha nga video, ila kining gipatan-aw sa NBI 7 kon aduna bay igong basehan para madakpan ang responsabli.
Busa gipahigayon ang entrapment operation niadtong hapon sa Nobiyembre 24.
Si Arce nagkanayon nga gipangayoan og P100,000 ni Bargamento ang maong vendor aron makaangkon og pwesto sa second floor sa interim market nga padayong gitrabaho sa Cebu2World Development Incorporated nga maoy balhinan sa mga vendors nga maapektohan sa pagtukod unya sa modernong merkado sa Warwick Barracks ug Freedom Park.
Ang Market Administrator nga si Irvin Cabales niingon nga iya nalang itugyan sa korte ang paghusay sa kaso base sa mga merito sa ebedinsya nga nasakmit sa mga awtoridad.