GIKAN pa sa iyang ilegal nga trabaho sa cyber ug namaligya dayon og shabu ang duha ka binabaye kinsa nasikop atol sa buy-bust operation sa Calinan Police Station, Huwebes sa gabii, Nobyembre 25, didto sa Purok 34, Rubber Village, Calinan, Davao City.

Si Police Major Jake Goles, hepe sa Calinan police, nag-ila sa mga suspek nga sila Wiljun Vilbestre, alyas Paye, 32-anyos, mulopyo sa maong lugar, ug usa ka Marvin Talandron, alyas Marvin, 32-anyos, taga Purok 7, Bangayan Village, Panabo City.

Sumala ni Major Goles ang mga suspek napalitan og usa ka pakite sa gituohang shabu, nakuhaan sab sila sa ilang posisyon og lain pang duha ka mga pakite ug shabu paraphernalia.

Anaa sa 0.20 gramos ang gidaghanon sa mga ilegal nga druga nga mikantidad og P3,000 ang narekober gikan sa posisyon sa mga dinakpan.

Giandam na ang ipasaka nga kaso batok sa mga suspek didto sa korte.