COTABATO CITY -- Personal nga atraso ang gilantaw sa mga awtoridad nga motibo sa pagpusil-patay sa ukay-ukay vendor alas 11:45 sa buntag, Huwebes, Nobyembre 25, sa dakbayan.
Giila ang biktima nga si Jomar Utto Tatak, 41, minyo ug molupyo sa Purok Magungaya, Barangay Rosary Heights 3, Cotabato City.
Matud ni Cotabato City Police Office Director Colonel Rommel Javier nga nagpagupit ang biktima sa Dam Barber Shop sa Liwa Candao Street, Barangay RH 3 sa dakbayan apan kalit lang siyang gisulod sa barber shop sa tulo ka wala mailhing lalaki ug gipusil gamit ang kalibre .45 nga pistola ug 9mm pistol ug dayong sibat sakay sa duha ka mga motorsiklo.
Si Tatak namatay gilayon human makaangkon og mga samad pinusilan sa nagkadaiyang parte sa lawas.
Samtang gibutyag sa pamilya nga dugay nang nagsulti ang biktima kanila nga nakadawat siya og hulga sa kinabuhi pinaagi sa text sa selpon.
Hinuon kapulisan sa CCPO padayon nga nagsubay sa insidente.