UNOM ka mga tawo ang gitumbok nga maoy ningtulis ug ningpatay sa magtiayong German national ug Pinay sa Brgy. Maño, lungsod sa San Remigio, amihanang Sugbo.
Kini maoy gibutyag ni Major Ian Macatangay, hepe sa San Remigio Police Station nga nahinabi sa Superbalita Cebu, nagkanayon nga ang mga tulisan taga diha ra sa lungsod.
Duha niini, ilang nailhan ang mga ngan ug nagpaabot nalang sila sa dugang pamahayag sa mga saksi nga ilang makuha.
Samtang gitukod sa Cebu Police Provincial Office (CPPO) ang usa ka Special Investigation Task Group (SITG) aron motutok sa imbestigasyon.
Gibutyag ni Macatangay nga gi- torture sa mga tulisan ang asawa nga si Zenaida Buenaventura Wind, 62, kay makita sa iyang mga kamot nga dunay daghang mga samad.
Gituohan nga dunay dakong kantidad sa kwarta nga sulod sa vault, apan ila pang ihinabi ang mga higala ug kabanay.
“Gi-tortured ni nila ang asawa. Dugay guro mitug-an sa password sa pag-abli sa sa vault. Makita man nga daghang samad sa lawas, kamot gipaantos una gipatay,” dugang ni Macatangay.
Samtang si Joseph gipatay sa mga tulisan kay hayan nisukol kanila.
Ang server sab sa CCTV camera nawala ug posibling gidala sa mga tulisan ug gilabay.
Ang gibilin modem ra hinungdan nga ilang gisubay sa crime scene ug sa dapit kay basin gilabay sa mga tulisan.
Nahibaw-an usab sa kapulisan nga si Zenaida taga Pangasinan.
SITG GITUKOD
Nag umol na og SITG ang CCPO sa aron motutok kay ang bana usa ka langyaw busa nagkinahanglan og grupo nga motutok sa kaso. (GPL, AYB)