MOABOT sa 20 ka ushers sa illegal Small Town Lottery (STL) sa siyudad sa Mandaue nga gipadagan sa Omega company gipangdakop sa Criminal Investigation and Detection Group (CIDG) 7 uban sa Mandaue City Police Office (MCPO), Regional Special Operations Group (RSOG) 7 ug Regional Intelligence Division (RID) 7.
Matod ni Police Colonel Irene Dalogdog, hepe sa CIDG-7, nakadawat sila og report nga naghitak ang illegal nga sugal sa maong siyudad ug tungod niini, nihimo sila og pakisusi ug pagpaniid.
Human matino nga kini tinuod, gihimo dayon ang operation nga niresulta sa pagkasikop sa maong ushers ug pagkasakmit sa mga booth niini nga gipangbutang lang sa daplin sa karsada.
Si Police Major General Albert Ignatius Ferro, direktor sa CIDG nga personal nga nianhi sa Sugbo, nagkanayon nga nakadawat sila og suwat gikan ni retired Police Colonel Royina Garma nga mao na karon ang general manager sa Philippine Charity Sweepstakes Office (PCSO) nga hatagan og pagtagad ang mikuyanap nga illegal numbers game tungod kay nakaapekto kini sa kita sa PCSO.
Tungod niini, iyang gimandoan ang iyang mga sakop sa tanang regional offices sa CIDG nga molusad ug all out war batok sa illegal gambling nga mi resulta dayon sa sunodsunod nga dakop sa tibuok nasud.
Ila usab nga ipaubos sa imbestigasyon kon kinsa ang tag-iya sa Omega company nga nagpadagan sa illegal STL sa Mandaue sanglit sa ilang gihimo nga pakisusi, walay legal franchise agent sa STL nga nagpadagan sa maong siyudad.
Kon ilang mahibaw-an kinsa ang financier, ilang ipasaka ang kaso bisan kinsa pa ang nagpaluyo niini aron matabangan ang PCSO sa ilang nawagtang nga kita nga ang maka benepisyo mao ang katawhan nga walay ikapalit sa ilang tambal ug ika bayad sa tambalanan.
“We will investigate who is the owner of this company and the said company is not listed in the list of authorized STL AAC Operator nga gi isyu sa PCSO, usually ang violation nila ang PD 1602 but it was amended by republic act 9287 para medya mag increase ang penalties,” matod ni Ferro.
Si PCSO General Manager Royina Garma nga naatol usab nga naa sa siyudad sa Sugbo miangkon nga moabot ngadto sa P20 million ang ilang alkanse matag buwan sa kita sa lotto outlet sa Mandaue tungod sa illegal STL.
Inay sa legal nga lotto outlet nga mopatad ang mga tawo, didto kini moadto sa illegal STL sanglit ang resulta niini gikuha sa national nga draw sama sa swertres, 2 digits ug 4 digits.
Mireklamo na ang mga authorized agent sa STL sa dakbayan sa Sugbo, Lapu-lapu ug sa probinsya tungod sa kadaghan sa outlet sa illegal STL sa Mandaue nga gumikan niini nagpadala silag suwat sa iyang buhatan didto sa kaulohan.
Gumikan niini, nagpadala na usab siyag sulat sa Malacañang pinaagi ni Secretary Jesus Quitain ug sa Chief PNP nga hatagan kinig aksyon ang maong problema.
“Im very thankful that the CIDG responded to our letter request and hopefully we will be able to address yung pababa na sales, at hindi lang STL, when we also reviewed our sales sa lotto nasa area ng Mandaue sobrang baba din ng lotto sales namin,” matod ni Garma.
Dugang ni Garma nga niadtong Marso 2021 gi-terminate sa PCSO ang prankisa sa nag-operate sa STL sa Mandaue tungod sa mga isyu nga nagdumili na kini sa pagpirma sa kontrata sa ilang ahensya nga maoy hinungdan nga abli ang pagdawat sa mga mo apply nga mopadagan sa STL sa maong siyudad.
Human masuta nga Omega company ang nagpadagan sa illegal STL i ban na kini sa PCSO sa pag salmot nga maka apply alang sa legal nga prankesa.
“We don’t have an authorized agent na Omega, we did not authorize, wala kaming ka transact na business with Omega kahit previously wala, mabuti nga lumabas sa report na Omega eh, pag mag apply to di ban na talaga,” matod ni Garma.
Tungod sa maong kalampusan sa CIDG-7 ug Mandaue City Police Office, gidayeg kini ni Garma dungan sa awhag sa CDIG director nga hatagan kinig pasidungog nga tugbangan usab sa PCSO.
Dako matod pa og tabang ang kapulisan sa pagpuhag sa illegal gambling sa nasud ilabi na nga diha mokuha ang gobiyerno sa pundo alang sa pagtabang sa mga kabus. (AYB, BBT)