BAKUNADO na ang tanang mga empleyado sa munisipyo sa lungsod sa Dumanjug, lalawigan sa Sugbo.
Kini maoy gipahibalo ni Dumanjug Mayor Efren Gica atol sa pakighinabi kaniya human sa turnover sa usa ka road project sa Barangay Cotcoton.
Matod ni Gica nga dako ang natabang sa iyahang pagluwat og memorandum nga naghimo og mandatory sa pagpabakuna sa tanang empleyado niini.
“I will personally urge my people to get vaccinated,” sigon pa sa mayor sa lungsod.
Kahinumdoman nga niadtong Agusto 23, 2021 niluwat og memorandum si Gica may labot sa pagpabakuna sa mga regular ug job order nga mga empleyado.
Paagi usab nga mahimong modelo ang mga empleyado sa uban pang mga residente nga nagduha-duha pa sa pagpabakuna kontra Covid-19.
Subay sa nagpadayon nga vaccination program sa lungsod, sugdan niini ang pagpamakuna sa matag barangay sa Disyembre.
“We will not stop until everyone is vaccinated,” dugang sa mayor.
Sa kasamtangan, di mominos 20,000 ka mga indibidwal sa lungsod ang fully-vaccinated. Ang Dumanjug dunay kinatibuk-ang populasyon nga 57,823 sa 2020.