MOABOT sa P100,000 nga papremyo sa grand draw ang madawat sa residente sa dakbayan sa Naga kon magpabakuna kontra Covid-19.

Kini kabahin sa ihatag nga incentives sa kagamhanan alang sa pagpadayon sa pagpamakuna sa siyudad.

Usa kini sa pamaagi sa dakbayan aron daghang magpabakuna sa National Vaccination Drive nga magsugod sa Nobiyembre 29, 30 ug Disyebre 1, 2021.

Ang mananaog sa maong rafle draw makadawat og P10,000 sa 1st prize; P5,000 sa 2nd prize; ug P3,000 alang sa 3rd prize. Di usab maalkanse tungod kay makadawat pa og P1,000 ngadto sa P500 alang sa consolation prizes.

Gipasidaan sa kagamhanan nga dili wagtangon ang vaccination cards sanglit mao kini ang basehanan o entry alang sa raffle draw.

Ang mga empleyado sa kagamhanan, dili hinuon tugutan sa pag-apil sa naasoy nga raffle draw.

Ang grand draw gikatakda sa Disyembre 31 diin mahimong makaapil ang mga residente nga nagpabakuna gikan sa Pebrero 2021 hangtod sa Disyembre 2021.

Sa maong higayon, madawat sa mga mananaog ang P25,000 cash alang sa 3rd prize, P50,000 sa 2nd prize ug P100,000 sa 1st prize.

Makadawat usab og P3,000 matag usa alang sa consolation winners.

Base sa datos sa Visayas Vaccination Operations Center (VVOC) nakab-ot sa siyudad ang 41.46 porsiyento na nga kompletong nabakunahan kontra Covid-19.