ANG Cebu City Police Office gimandoan sa bag-ong milingkod nga mayor nga si Mayor Michael Rama nga ipadayon ang pagpatunhay sa kalinaw sa siyudad ug magbantay sa posibling pag abot sa mga dayo nga kriminal human ablihi ang tanang border control sa mga taga laing rehiyon.

Hingpit na nga milingkod ang bag-ong mayor sa siyudad sa Sugbo nga si Michael Rama human mitaliwan sa laing kalibutan si Mayor Edgardo Labella sa miaging semana.

Usa sa iyang mando ngadto sa kapulisan ang pagpadayon sa paghatag sa siguridad sa dakbayan aron malinawon ang nagsingabot nga pasko ug ang dakong kalihukan ang sinulog.

Matod ni Police Colonel Josefino Ligan pangulo sa kapulisan sa dakbayan sa Sugbo nga ilang gipadayon ang crime prevention aron mahimong luwas ang mga Sugboanon ning panahon sa holiday season.

Atol sa gipatawag nga command conference ni Ligan sa iyang mga chiefs of police iyang gimandoan nga ilusad ang target hardening measures tungod sa posibilidad nga mangabot sa dakbayan ang mga notadong kawatan gikan sa silingang mga rehiyon sa Visayas ug Mindanao.

Gipa monitor usab ang mga pension houses ug mga boarding houses sanglit kasagaran sa mga kawatan gikan sa laing lugar mag abang kinig balay dinhi sa dakbayan sa Sugbo.

“Atong gi expect tungod kay open na ang economy ang mga tirador open napud na, meaning basin mag byahe na diri sa atoang area to take advantage sa events. Akong giingnan ang mga commanders nato nga start target hardening, liaise with the security officers sa mga gagmay nga mga pension houses kay usually adto ni sila mo imbudo didto,” matod ni Ligan.

Matod ni Ligan nga tungod kay abli na ang border control sa dakbayan sa Sugbo dako ang kasigurohan nga ang mga kriminal moanhi na usab sa dakbayan sa Sugbo aron mamiktima sa mga sugboanon sama sa salisi gang ug tiempo artist.

Gimandoan usab ang mga personnel niini sa mga police station nga mobisita sa mga establisemento sama sa mga kan-anan aron pasidan-an nga dili mo kompyansa ug labing maayo nga adunay mga CCTV camera sa ilang lugar.

Hugot ang pakig alayon sa CCPO sa ilang counterpart sa Mindanao ug ubang bahin sa Visayas ug Luzon labot sa lihok sa mga notadong kawatan aron sa pantalan pa lang ila na kining ma monitor.