TULO ka gikatahapang mga tulisan buwag nga nasikop sa Huwebes, Nobiyembre 25, 2021 sa Opao Police Station sa Mandaue City Police Office (MCPO) sa Dakbayan sa Mandaue.

Pasado alas 12:00 sa udto, unang nadakpan sa mga sakop ni Police Major John Libres, hepe sa Opao Police Station, si Ronie Urot Compayan, 27, sa Barangay Looc, Dakbayan sa Mandaue.

Paglabay sa usa ka oras, nadakpan ang ig-agaw niining si William Lliban Urot, 31, lumolupyo sa samang barangay, apan didto na siya nadakpan sa Sityo Canamucan, Barangay Gimbal, lungsod sa Compostela.

Una nang nadakpan si Ryan Camirino Suaverdez, 32, sa Barangay Gimbal, apan lumad nga taga Barangay Looc.

Matod ni Libres nga sila si Compayan, Urot ug Suaverdez parehong nalutsan og warrant of arrest sa kasong Robbery with Violence Against or Intimidation of person nga giluwatan ni Judge Fruto Teodorico lll, presiding judge sa Regional Trial Court (RTC) Branch 86 sa Dakbayan sa Mandaue.

Dugang ni Libres nga sila pulos mga akusado sa pagtulis sa usa ka truck driver niadtong Mayo ubos sa jurisdiction sa Opao Police Station.