GIDAKOP sa Bureau of Immigration ang usa ka British nga lalake sa isla sa Bantayan, Cebu tungod sa pag-abuso sa iyang asawa nga Pinoy ingon man sa ubang lokal nga mga babaye.

Si Charlton William Sydney, 72, nag-atubang karon sa deportation human giakusahan siya sa iyang gibuwagang asawa nga undesirable alien tungod sa giingong pag-abuso ug pagmaltrato kaniya.

Sa usa ka pamahayag kaniadtong Biyernes, ang bureau niingon nga ang mga sakop gikan sa BI Intelligence Division midakop kang Sydney kaniadtong Lunes, Nobiyembre 22, sa usa ka beach resort sa lungsod sa Sta. Fe.

Si Immigration Commissioner Jaime Morente miingon nga nag-isyu siya og mission order alang sa pag-aresto kang Sydney pagkahuman ang Board of Commissioners sa bureau mihimo sa desisyon nga kanselahon ang permanent resident visa sa Briton tungod kay siya undesirable alien.

Ang bureau niingon nga si Sydney kaniadto adunay permanent visa nga iyang nakuha tungod sa iyang kasal sa usa ka Pinay.

Apan gikansela sa BI ang maong visa sa miaging tuig human ang iyang asawa nipasaka og “complaint for undesirability” batok kaniya.

Sa iyang reklamo, ang estranged wife ni Sydney nipasangil nga sa dihang sila nagpuyo, ang iyang bana physically, psychologically ug emotionally nangabuso kaniya.

Dugang pa niya nga gihaylo usab sa Briton ang mga kabus nga babaye nga makigdulog kaniya bugti sa kuwarta, matod sa BI.

Sa mando niini nga kanselahon ang visa ni Sydney, ang BI Board nag-ingon nga ang Briton nakalapas sa mga kondisyon ug limitasyon sa iyang pagpabilin isip naghupot sa usa ka permanent resident nga visa, ug nga “ang iyang presensya sa Pilipinas nameligro na sa interes sa publiko.”

Hangtod sa hangtod nang gidid-an si Sydney sa pagsulod pag-usab sa nasud.

Laing langyaw

Niadtong Lunes lang, Nobiyembre 22, gianunsyo sa BI ang pagdakop sa laing langyaw sa Sugbo ug ang iyang pending nga deportasyon.

Ang Lebanese nga si Rabih El Acha Hassouneh, 43, nadakpan sa Basak, dakbayan sa Lapu-Lapu tungod sa gikatahong nagtrabaho nga walay saktong visa ingon man overstaying.

Usa ka mission order ang gipagawas usab batok kaniya.

Ang Executive Order 287, s. 2000 naghatag og pagtugot sa BI commissioner sa pag-isyu og mga mission order nga nagmando sa mga opisyal sa bureau sa pagpahigayon og verification ug mga operasyon sa pag-imbestigar batok sa gidudahang illegal nga mga langyaw.

Kon adunay probable cause, himuon ang warrantless arrest sa mga langyaw tungod sa paglapas sa balaod sa imigrasyon sa Pilipinas. (CTL)