Gibunalan og korona sa Sacramento Kings ang Los Angeles Lakers ug nalup-og kini sa 141-137 sa ilang duwa kagahapon nga niabot og tulo ka overtime.
Si De ‘Aaron Fox nibonal og 34 puntos para pangulohan ang Kings sa ilang duwa sa National Basketball Association, diin niabot og 19 ka higayon nga nagtabla ang iskor ug 23 ka higayon nagpuli-puli og labaw ang duha ka teams.
Nangulo sa kapildehan sa Lakers si LeBron James nga nihagpat og 30 puntos, 29 puntos ang giamot ni Russell Westbrook samtang 23 puntos ang giabay ni Anthony Davis.
Sa ikatulong overtime, ang Lakers naglabaw, 126-124 sa nahabiling 1:54 dihang ang Kings nipabuto og 11-2 run aron molabaw og 7 puntos diin si Marvin Baley II nikadlit og 5 puntos apil ang three-point play.
Si Carmelo Anthony nipasulod sa iyang tres sa nahabiling 9.4 seconds aron ipadikit ang iskor apan napasulod ni Hield ang duha ka free throw aron silyohan ang ilang kadaugan.
Ang Kings giabagan ni Hield sa iyang 25 puntos, 19 ang giamot ni Tyrese Haliburton ug laing upat ka players ang nihipos og double digit nga puntos aron angkunon ang kadaugan.
Sa maong kadaugan, si interim coach Alvin Gentry aduna nay 2-1 win-lose record samtang ang Lakers, 10-11 win-lose record human sila napilde og ka-lima sa ilang uwahing pito ka mga duwa.
Sa unang overtime, ang Lakers niiskor sa unang unom ka puntos ug naglabaw 110-103 sa wala pa nisagunson og pito ka puntos ang Kings apil na ang tres ni Hield sa nahabiling 28 segundos ug yanong gi-lay up ni Davis ang bola sa nahabiling 9 seconds apan nibawos ang Kings pinaagi sa 18-foot jumper ni Hield nga maoy nagtabla sa duwa paingon sa overtime.
15TH STRAIGHT SA SUNS
Ang Phoenix Suns maoy labing init nga team karon sa NBA human ilang gipilde ang New York Knicks, 118-97 didto mismo sa Madison Square Garden nga maoy ika-15 nga sunodsunod nga kadaugan.
Si Devin Booker maoy nangulo sa Suns pinaagi sa iyang 32 puntos samtang si Kemba Walker nihagpat og 17 puntos para sa naparot nga Knicks kinsa kapito na gisagunsonan og pilde.
Samtang girehistro sa Golden State Warriors ang ilang ikaunom nga sunodsunod nga kadaugan human ilang gilamparo ang Portland Trail Blazers 118-103 sa ilang balwarte.
Si Stephen Curry nipaarak og 32 puntos aron pangulohan ang Warriors samtang si Damian Lillard maoy nangulo sa Blazers sa pinaagi sa iyang 16 puntos.