Ang beteranong sportscaster, ug kanhi sports columnist nga si Ed Picson mao na karon ang presidente sa Association of Boxing Alliances in the Philippines (ABAP).
Si Picson, kanhi secretary-general sa maong asosasyon, napili ug maoy mosunod ni Ricky Vargas isip pangulo sa boxing federation sa nasod atol sa ilang regular elections nga gipahigayon Huwebes, Nobiyembre 26, 2021.
Sa wala pa siya mapiling presidente, si Picson nagserbisyo sa hataas nga panahon isip executive director ug nahimong secretary-general sa ABAP, sa dihang si Vargas ug ang grupo ni Manny V. Pangilinan maoy miasumir sa liderato sa pundok niadtong 2009.
Si Vargas, ang arkitekto sa ilang kalampusan sa Tokyo Olympics diin sila nakahagpat og tulo ka medalya, maoy mi-nominate ni Picson isip iyang successor. Sa iyang pagkanaog sa pagka presidente, si Vargas moasumir na karon pagka chairman sa ABAP.
Ang ubang napili atol sa election mao ang deputy speaker nga si Robbie Puno isip vice president, kanhi congressman ug long-time boxing patron Raul Daza isip vice chairman.
“I am honored to turn the baton over to Ed as my successor. He is the most qualified and deserving for the position,” ni Vargas pa. “Ed is a principled and honest man who believes in good governance, cares very much for our boxers, and is hands on. I’m confident he will bring ABAP to the next level.”
Si Picson, sa iyang bahin, mapasalamaton sa pagsalig sa ABAP ngadto kaniya.
“The results in the last Olympics where Nesthy Petecio and Carlo Paalam won silvers, and Eumir Marcial got bronze, will be a tough act to follow. But our boxers, coaches, and support staff assure me they are all up to the task. We vow not to let the country down,” matod ni Picson nga lumad nga taga Tacloban City kansang amahan taga Hindang, Leyte.
Aduna usab siyay dugong Sugboanon gumikan kay ang iyang apohan nga babaye taga Sugbo man usab.
Ang pagtudlo og secretary-general ug treasurer sa federation maoy unang lihukon ni Picson atol unya sa board meeting sunod semana.