Migallen: Obiena mahisama ni So; mobiya usab sa nasod?

Migallen: Obiena mahisama ni So; mobiya usab sa nasod?

Imbis molurang, maora na hinuon og gihapak sa unos kining bingkil tali sa Olympic Pole Vaulter nga si EJ Obiena ug sa Philippine Athletics Track and Field Association (Patafa) nga gipangulohan ni Philip Ella Juico.

Ang issue? Gialegahan ni Juico si Obiena og pangawkaw sa kuwarta nga alang unta sa iyang langyawng coach nga si Vitaly Petrov sa Ukraine.

Matod pa sa alegasyon nga niadto pa diayng 2018 nga wala makadawat si Petrov sa iyang suweldo samtang nagserbisyo siya ni Obiena.

Hugot nga gihimakak ni Obiena ang maong pasangil ug aron pag-alkontra sa maong pasangil, nagpatawag gilayon kini og press conference aron paglimpiyo sa iyang pangalan.

Aron gyud pagpalig-on ug pagpamatuod nga dili tinuod ang alegasyon, nitambong mismo si Petrov ug nisuporta kang Obiena.

Gibutyag ni Petrov nga dili tinuod ang pasangil ug gani bag-o lang siya nakadawat sa iyang suweldo.

Imbis mangayo og dispensa kay lagi mismo ang coach na man gyud ang namahayag, sa unsang pagka unsaa nga nangita na man hinuon si Juico og laing violation ni Obiena.

Ning higayona, iyang gialegahan ang 26 anyos nga athleta nga nimaniobra o ni-falsify sa mga dokumento nga nag-liquidate sa iyang mga gasto lakip na ang suweldohan sa iyang trainer. Buot ipasabot nga dunay wala magkatukma.

Giangkon ni Obiena nga nadelatar siya sa iyang pagsuweldo ni Petrov tungod sa kahugot sa iyang training didto sa Italy. Apan alang kaniya, dili salaod kon aduna man gani kalangay sa iyang pagsuweldo sa iyang coach.

Alang nako simpol ra gyud unta kaayo nga mahatagan og solusyon kining maong isyu. Pero mura man og nagpataas sa iyang ihi kini si Juico kay tiaw mo bay dili siya gusto nga mo intervene ang Philippine Sports Commission (PSC) aron mahusay ang kasungi-an.

Sila-sila ra kuno sa Patafa ang mohusay niini ug iyang gibarogan ang iyang alegasyon.

Iyang ipadayon ang hugot nga imbestigasyon ni Obiena aron pangitaan kini og sayop diin maoy iyang basehan aron dili na kini malakip sa national team. Sa ato pa, masabot nga aduna siyay pagdumot ni Obiena.

Kon mao ni giapas ni Juico, dili halayo ang posibilidad nga kini si Obiena mahisama kang Wesley So, ang chess grandmaster sa Pilipinas kinsa napugos sa pagbiya sa nasod ug atoa na karon magrepresentar sa US human gikabangi usab niini ang chess federation niadtong 2014. Si So usa na karon ka super grandmaster ug kasamtangang No. 8 sa world rankings.

Sa sitwasyon ni Obiena, wa gyud sa iyang plano ang pagbiya sa iyang yutang natawhan, apan unsaon man niya pagpalambo sa iyang abilidad ug pag-excel sa kompetisyon kon ang federation nga iyang gisandigan wala nay gusto kaniya.

Sa interview sa One News, ang iyang adviser nga si James Lafferty mibutyag nga daghan nang mga nasod nga interesado mohatag og visa o passport ni Obiena kon enkaso makadesider kini nga mobalhin ug mobiya sa Pilipinas.

Kini taliwala sa kontrobersiya nga mihamok karon sa lumad nga taga Tondo, Manila.

Naghinamhinam na ang ubang nasod nga nagsigi og paniid sa sitwasyon ni Obiena.

Unless adunay makab-ot nga solusyon aron mahatagan og kasulbaran kining maong isyu, di ta ka basol kon si Obiena mosunod sa lakang ni So. Pinoy athlete nga magrepresentar sa laing nasod.

Subo palandungon nga ang Pilipinas nga naghingutas sa pag-umol og atleta nga makahatag og medalya sa mga international competitions, magsalikway na hinuon og potensiyal nga mga athletes.

Dako ning tamparos sa atong mga sports leaders. (jun.migallen22@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph