Dili masukod ang kalipay kon ikaw kinasingkasing nga motabang sa imong isig ka ingon labi na ang paghatag og pagkaon sa mga gipanggutom.
Matag Martes, naandan na sa grupo nila Trifon “Ate Tata” Fernandez Jalapit nga magpa-feeding. Ang ilang paagi magdunol og mga pan sa mga tawo nga ilang maagian samtang sakay og sakyanan. Ilang libuton ang kadalanan sa Sugbo.
“Kalipay nga dili hitupngan nga nakadunol ka sa imong isig katawo,” paghulagway ni Ate Tata sa iyang gibati kabahin sa ilang feeding program.
Niadtong Nobiyembre 9, natungod gayud sa adlaw nga natawhan ni Ate Tata ang ilang feeding.
Ang feeding program gi-organize ug proyekto sa Bread of Life nga grupo ni Padre Vincent Bahian. Kaabag niini si Ate Tata.
Ang kasaulogan sa ika-58 nga birthday ni Ate Tata gihimo niadtong Nobiyembre 13 sa Boyong Beach House sa Barangay Maribago, siyudad sa Lapu-Lapu.
Gisugdan kini og santos nga misa nga gikonselebrar sa mga suod ug higalang kaparian ni Ate Tata. Apil sila si Fr. Derick Mainty Andry, Fr. Henry Go, ug Fr. Felmar Castrodes, station manager sa sibyaanang dyRF.
Matod ni Ate Tata, nindot ang bation nga makatabang ka sa uban tungod kay kapila usab pil-on ang mga grasya nga imong madawat.