Ni-post sa social media sa gabii sa Biyernes, Nobiyembre 26, si Cebu City south district Representative Rodrigo Abellanosa nga gamay ra ang mga firetruck nga nakaresponde sa sunog sa sityo Lawis, Barangay Mambaling kay gigamit sa funeral route sa paglubong ni anhing mayor Edgardo Labella nianang hapon sa samang adlaw.
Negatibo ang kasagarang reaksyon sa mga netizen sa iyang post.
Una, di man tinuod nga ang mga firetruck wa mabalik sa ilang tagsa ka stations sa paghuman. Hagbay ra man miagi ang truck nga nagkarga sa lungon sa namatay nga mayor. Human sa pag-agi, nibalik ra sab kini sa ilang tagsa ka fire stations nga naa ra sab sa duol.
Ikaduha, nahutdan kuno dayon og tubig ang mga trak hinungdan nga nakakatap dayon ang kayo. Ang nagamit nga tubig sa water salute gamay ra gyud. Hinay ra ang pagpasirit og tubig kay water salute gani. Ingon sa nagpauwan lang og tubig agig pagyukbo sa namatay nga mayor. Gibuhat kadto kay aktibo pa sa serbisyo si Labella isip mayor dihang namatay.
Ikatulo, di unang hitabo nga nahutdan og tubig ang firetrucks tungod sa kadako sa sunog nga niugdaw og 679 ka mga balay. Sa dagkong mga sunog, daghang firetrucks ang mahutdan og tubig. Mao ni tumong gani sa gipamutang nga fire hydrants sa nagkadaiyang mga dapit sa Dakbayan sa Sugbo. Adto magkuha og tubig kon mahutdan.
Hangtod nga duna nay comments nga nagkwestyon kon unsay nabuhat ni Abellanosa sa iyang pagka kongresista alang sa pagpalambo sa fire response sa Bureau of Fire Protection (BFP) dinhi sa Dakbayan sa Sugbo. Duna ba?
Dalaygon baya kaayo ang kabomberohan sa siyudad sa ilang kampanya alang sa mas paspas ug epektibong pagtubag og mga alarma sa sunog.
Nagbansay sila og fire responders sa barangay level, labina sa mga dapit nga dunay kaugalingong firetrucks.
Karon, unsa kahay nabuhat ni Abellanosa aron molambo pag maayo ang pagresponde sa kabomberohan sa siyudad sa mga emerhensya?