Ang Consolacion nag-andam og lima ka vaccination sites aron gamiton atol sa National Vaccination Days gikan Nob. 29-Dis. 1, 2021 sa tinguha niini nga mahatagan ang 18,000 ka mga tawo sa bakuna batok sa coronavirus disease.

Kini nga mga dapit mao ang Municipal Gym, SM Consolacion, Mendero Hospital, Barangay Garing Gym ug Tayud Gym, pahibawo ni Mayor Joannes “Joyjoy” Alegado niadtong Biyernes, Nobiyembre 26.

Matod niya nga gipaabot sa Department of Health nga ang lungsod makabakuna og 18,000 ka mga tawo, lakip na ang mga menor de edad nga 12-17, sulod sa tulo ka adlaw.

Gitahasan sa mayor ang mga opisyal sa 21 ka mga barangay sa lungsod sa pag-adto sa matag purok aron mailhan ang mga residente nga wala pa mabakunahan batok sa Covid-19, ug dad-on sa mga vaccination site.

Si Presidente Rodrigo Roa Duterte niisyu sa Proclaimation 1253 nga nagdeklarar sa tulo ka adlaw isip “Bayanihan, Bakunahan National Covid-19 Vaccination Days” sa tinguha nga mapadali ang pagbakuna batok sa Covid-19 ug pagkab-ot sa nasod alang sa herd immunity.

Kadtong mobiya sa ilang trabaho aron magpabakuna ning mga adlawa dili mamarkahan og absent basta magpakita sila og ebidensya nga nagpabakuna ngadto sa ilang mga labaw.

Gikan sa inisyal nga target nga 15 milyones ka tawo nga mabakunahan sulod sa tulo ka adlaw nga yugto sa tibuok nasod, bisan pa niana, ang gobyerno niadtong Sabado, Nobiyembre 27 nipakunhod sa target nga 9 milyunes, tungod sa kakuwang sa syringes ug kalisod sa pagdala sa mga bakuna ug uban pang mga gamit, labina sa hilit nga mga dapit.

Ang tulo ka adlaw nga pagpamakuna langkuban sa 16 ka mga rehiyon gawas sa National Capital Region.