Senior citizen gidunggab-patay sa iyang pag-umangkon human nangasaba alas 6 sa buntag Biyernes, Nobiyembre 26, sa Sitio Drilling, Brgy. Tubod, dakbayan sa Toledo.

Si Armando Hermoso Rubin, 73, biyudo, trisikad driver, namatay diha-diha human nakaangkog samad dinunggaban sa walang bahin sa lawas.

Nasikop ang suspek nga si Wincent Rubin Antopina, 38, dunay kapuyo pag-umangkon sa biktima.

Sa imbestigasyon ni Police Staff Sgt. Alfredo De Gracia, Jr., sa Toledo Police Station si Rubin sayo nga nangasaba sa iyang 6 anyos nga apo nga lalake.

Naagi si Antopina tungod sa ilang panimalay ug nasuko, nagkalalis sila ni Rubin.

Si Antopina nagdali sa pagpauli sa ilang panimalay aron pagkuhag kutsilyo.

Nibalik kini sa balay ni Rubin, kinsa wala kabantay,gihansakan ni Antopina sa kutsilyo sa walang bahin sa lawas.

Ang duha gikatahong dunay karaang panagbangi labi na sa panahon nga mahubog si Rubin nga magmaoy.