Si Cebu City Mayor Michael Rama namahayag nga gusto niya nga mapadali ug maandam ang cash assistance sa mga nasunogan sa sityo Lawis, Barangay Mambaling sulod sa tulo ka adlaw.

“Sa tulo ka adlaw, gusto nako nga maandam ang cash assistance para sa mga nasunogan. Sa tulo ka adlaw, gusto nako nga maandam ang cash assistance sulod sa 3 ka adlaw, ako sad niingon kang Raymond Garcia nga unta mag session mi ugma para magdeklarar og calamity within the day. Nganong maghulat pa og Lunes? Mahimo nilang gamiton ang Zoom kon gusto nila nga dali,” matod ni Rama.

Ang sunog niigo sa Sitio Lawis sa pasado alas 5 sa Biyernes sa hapon, Nobiyembre 26 ug nilanat hangtod sa gabii tungod sa kadako.

Niugdaw kini og 679 ka mga balay nga nakaapekto og 742 ka mga pamilya kun 3,282 ka mga tawo.

Matod ni Rama nga duol kaayo sa iyang kasingkasing ang Sitio Lawis tungod kay niadtong konsehal pa siya sa dakbayan, aduna siyay proyekto nga gitawag og Pasko sa Barangay diin siya ug ang iyang mga kawani makigsandurot ug makig-uban sa mga lumolupyo sa Sitio Lawis.

“Kauban ko ang labing kabus sa mga kabus ug kana gipili nga lugar nga adtoan sa City Hall aron dunay immersion. Para nako, it’s about time nga mag-immersion ta para mahibaw-an nato ang tinuod nga sitwasyon sa atong mga kabos,” dugang ni Rama.

Sa laing bahin, sa buwag nga pakighinabi sa mga tigbalita, si Mambaling Barangay Kapitan, Gines Abellana, namahayag nga aduna silay daghang mga isyu nga angay sulbaron kalabot sa sunog.

Ang mga lumolupyo nga nawad-an og kapuy-an tungod sa sunog nagpabilin sulod sa Mambaling Elementary School.

“Una, ang atong mga biktima sa sunog nagkinahanglan og mga higdaanan nga katulganan ug mga dapit nga ilang kapuy-an. Sa pagkakaron, foam ra ang among gihatag aron sila matulog. Ikaduha, pagkaon. Ikatulo, tubig. Ikaupat, asa sila maligo? Ikalima, nagkinahanglan sila og comfort room,” matod ni Abellana nga naa sa kaguol.