Halos way nay nabitbit nga mga gamit, gawas lang sa mga sapot tapot sa lawas ang mga lumolupyong apektado sa sunog niadtong Biyernes sa alas 5 pasado sa hapon, Nobiyembre 26, sa sityo Lawis, Barangay Mambaling, Dakbayan sa Sugbo.

Nasuta sa imbestigasyon sa Cebu City Fire Office (CCFO) nga tinuyo ang sunog, human dagkoti sa usa ka giingong drug addict nga lalake ang kurtina sa iyang giabangan nga kwarto.

Dali kining nisilaob ug niugdaw sa 679 ka mga balay ug nakaapekto sa 742 ka mga pamilya kun 3,282 ka mga tawo ug nidanyos og mga P725,000.

Si FO2 Fulbert Navarro, fire investigator, niila sa suspek nga si Rolly Siso, 39, kinsa gi-admit sa Cebu City Medical Center (CCMC) human siya pusila ug kulataha sa mga lumolupyo nga nasayod sa iyang gibuhat.

Kon wa pa moabot ang Special Weapons and Tactics (SWAT) team sa Cebu City Police Office (CCPO), hayan patay na si Siso.

Si Police Major Dindo Juanito Alaras, hepe sa Mambaling Police Station, nibutyag sa Superbalita Cebu nga si Siso naka hospital arrest sa CCMC.

Matod ni Alaras nga naputos sa mga bun-og si Siso ug duna pay samad pinusilan sa lawas, apan wa pa mailhi kinsa ang nipusil kaniya.

Dugang ni Alaras nga duna usay nadawat nila nga kasayuran nga nawala na sa pangisip si Siso hinungdan nga ingon niadto ang iyang gibuhat.

“Naa tay nadawat nga nalisoan na daw tong suspek pero dili man ta maka siguro ana kay doktor raman ang mo confirm ana,” matod ni Alaras.

Ang iyaan mismo ni Siso giingong nakakita sa iyang pagdagkot sa kurtina gamit ang usa ka lighter.

Dugang ni Alaras nga nahibaloan usab nila nga si Siso nadakpan ug napriso niadtong 2016 sa kaso nga kawat.

HINABANG



Samtang ang 3,000 kapin ka mga apektado sa sunog nagpunsisok sa elementary ug national high school.

Si Scarlet Genobisa, in-charged GAD focal person sa Barangay Mambaling, niasister sa mga nasunogan, niingon nga Siyudad sa Sugbo miapud-apud dayon og pagkaon sa mga nasunogan.

Matod ni Genobisa nga labing gikinahanglan sa mga fire victim ang tubig, habol, unlan, banig mga kahoy aron makabalik sa hinay -hinay sa pag tukod sa ilang pinuy-anan ug mosquito nets kun muskitero.

Dugang ni Genobisa nga andam sila kanunay modawat sa gusto modonar og mga hinabang nga mamahimo lang nga ihatud nila sa barangay aron ang mga opisyal na ang mag bahin-bahin ngadto sa mga biktima sa sunog.

Samtang unang adlaw human sa trahedya, pipila ka private organizations ang mitunol sa ilang mga tabang sama nalang sa grupo sa lesbian, gay, bisexual, transgender (LGBT).