DAKO ang pasalamat sa 35 ka mga lalaki ug 15 ka mga babaye kinsa maoy naglangkob sa 50 ka mga Indigenous People (IP) sa Sitio Kapatagan, Kapalong, Davao del Norte human nila nahuman ang ilang short-term course nga Electrical Installation and Maintenance (EIM) alang sa NC II sa Technical Education and Skills Development Authority (Tesda).

Si Merly, 24, usa sa mga benepisyaryo sa maong proyekto, nagbutyag nga usa ka prebeliheyo kini alang kanila nga mga IPs human sila nahatagan og kahigayonan sa gobyerno.

“Dako kaayo among pasalamat kay ang serbisyo sa gobyerno naabot gyod sa amoa, bisan layo nami sa siyudad, magamit gyod namo kini,” ingon ni Merly sa pakighinabi sa Superbalita Davao pinaagi sa Messenger Dominggo, Nobiyembre 28.

Sa nakalabay nga Nobyembre 19, 2021, gihimo ang Energization Project Ceremony uban sa partnership sa Northern Davao Electric Cooperative (Nordeco), Inc. sa Sitio Kapatagan, Barangay Gupitan, Kapalong, Davao del Norte.

Nagsugod ang maong proyekto sa Tesda niadtong Oktubre 12, 2021 pinaagi sa 14-day skills training alang sa Installing Electrical and Protective Devices ngadto na sa Electrical Installation and Maintenance (EIM) nga pang-NC II alang sa 50 ka mga Indigenous People sa Sitio Kapatagan.

Ang programa gipangunahan sa Regional Training Center - Korea Philippines Vocational Training Center (RTC-KPVTC), Davao diin ang mga benepisyaryo nag-install sa ilang panimalay og Wirings, nga gilangkuban sa Safety Switch Breakers ug ang Service Entrance Connections.

Human nasubay ang ilang gihimo, ang ilang mga output gikan sa nasampit nga training gipang-connect sa mga main feeder line sa Nordeco diin anaa sa 20 ka mga electric posts na nasigahan nga alang sa 50 ka mga panimalay sa Sitio Kapatagan.