DEAD on the spot ang ilado ug sikat nga boksidor niadtong dekada 90 nga si Gerardo "Gerry" Quiñones, 48, human kini nakuryentihan samtang duna siyay giayo sa usa ka establisyemento sa palengke sa lungsod sa Magsaysay, Davao del Sur niadtong Sabado sa buntag, Nobyembre 27, 2021.

Ang 48-anyos nga kanhi boksidor nasayran nga samtang nag-ilis og atop sa ikaduhang andana, aksidenteng naigo ang iyang lawas sa kable sa kuryente sa Davao del Sur Electric Cooperative nga dunay 13,000 ka boltahe.

Gisulayan pa sa pagsalbar ang biktima, kinsa dali nga gidala ngadto sa Municipal Disaster Risk Reduction and Management Office sa Viacrusis Hospital, apan gideklara kining patay na sa doktor.

Kanhi boksingero si Quiñones niadtong dekada 90 nga miaway sa daghang mga boksingero sa nagkalain-laing nasud.