Naghingapin ang kasubo ug kaguol ni Atty. Floro Casas Jr., Cebu City administrator, sa kamatayon ni Mayor Edgardo Labella. Kini nagsagol sa kasakit, kahiubos ug kahimangod sa tawo o mga tawo nga wa niya isulti kon si kinsa.
Ug sa dihang di na niya kapugngan ang nag-alintabo nga kasubo, kaguol, kasakit, kahiubos ug kahimangod nga nagluoy sa iyang dughan, niawas ang mga luha sa iyang mga mata samtang namulong siya sa necrological rites ni Labella niadtong Biyernes sa City Hall.
Ginaingon nga ang mga luha, sama sa uwan, mobanlas sa mga abog sa kinabuhi. Apan kon ang abog igo lang mabasa, mahimo kining pilit nga lapok. Wa kaha mopilit sama sa lapok ang mga kasakit, kahiubos ug kahimangod sa dughan ni Casas?
* * *
Si Mayor Labella usa ka survivor sa pagkalunod sa M/V Princess of the Orient niadtong 1998. Si Casas, ang pangabaga ni Labella, niingon nga kalunuron na ang barko nga gihimo ni Labella.
Nangayo siya og giya sa nitaliwan nga mayor aron makalingkawas usab sila sama ni Labella gikan sa usa ka “tragedy” ug “oppression” nga nahitabo kanila. Wa diay mosaler ang pasalig nga “I won’t rock the boat”?
Si Casas niingon nga nakasabot siya nga ang mga co-terminous officials sama niya, mawagtang sa puwesto sa pagtaliwan ni Labella. Apan ang iyang gisakitan mao ang usa ka buwan nga evaluation sa mga kawani sa pagsuta kon i-renew ba o di ang ilang appointment.
* * *
Si Mayor Michael Rama, ang bise mayor nga nihulip kang Labella, niingon nga, “I won’t rock the boat.” Tubag niya kini sa pangutana kon unsay mahitabo sa mga kawani sa City Hall.
Apan niadtong miaging Lunes, iyang gimando ang usa ka buwan nga evaluation sa mga kawani sa City Hall. Normal lang ang gibuhat ni Rama. Ang angay nga ibilin sa City Hall kadto rang makapakita nga nitrabaho gyud.
Si Rama usa ka beteranong politiko ug nasayod sa iyang angay nga pagabuhaton. Nagsingabot ang eleksyon ug nakahibawo siya kon asa padulong ang mga kawani nga iyang pagataktakon.
* * *
Gipadayag ni Casas nga ang mga tawo nga nidayeg ni Labella sa dihang namatay na, mao ang samang mga tawo nga nisaway ni Labella sa buhi pa siya. Ug alang kaniya si Labella ang “best mayor.”
Ngano man? Matod pa niya, “Sa akong pagkaila, ang akong mayor dili palaaway, ang akong mayor dili traydor, ang akong mayor dili hilabtanon, ang akong mayor dili bakakon ug ang akong mayor dili plastic.”
Ang laing mayor, unsa man diay?