Temporaryong gi-ban sa Pilipinas ang tanang flights gikan sa Hong Kong tungod sa nakaplagan nga Omicron variant, bag-o ug posibling mas grabe motakod kon itande sa unang Sars-CoV-2, matod sa tigpamaba sa National Task Force (NTF) Against Covid-19 Restituto Padilla kagahapon, Nobiyembre 28, 2021.

Sa usa ka television interview, si Padilla nagkanayon nga ang Inter-Agency Task Force (IATF) on Emerging Infectious Diseases temporaryo usab nga nisuspenso sa pagsulod sa flights gikan sa South Africa, Botswana, Namibia, Zimbabwe, Lesotho, Eswatini, ug Mozambique tungod sa kaso sa B.1.1.529 o Omicron variant sa maong mga nasod.

Ang ban epektibo hangtod sa Disyembre 15, 2021.

“Binantayan po lahat ng country na may na-detect na variant. So, Hong Kong, may na-detect po diyan...” matod ni Padilla.

“Ang movement po ng Filipino ay hindi pinagbabawal. Pero ‘yong flight na kanilang sasakyan na papunta dito, pinagbabawal. So, kung wala silang masasakyan, wala rin silang means para makarating,” dason niya.

Dugang ni Padilla, ang mga Filipino nga nakasulod na sa Pilipinas gikan sa maong mga nasod ipaubos sa estrikto nga quarantine procedures sa pagsanta sa Omicron variant.

Ang Omicron variant unang nakita sa Botswana, dayon sa South Africa.

Ang unang kaso sa Omicron sa Hong Kong usa ka biyahidor gikan sa South Africa.

Ang World Health Organization (WHO) niila sa Omicron isip usa ka variant nga makapabalaka tungod sa kapaspas ug kalapad sa iyang matakboyan tungod sa kakusog mosanay ug “dunay dugang pa nga kanaiya.”

Samtang, unang higayon gikan sa Enero ning tuiga, ang Department of Health (DOH) nitala og ubos sa 1,000 ka bag-ong kaso sa Covid-19 sulod sa sunodsunod nga upat ka adlaw, gikan sa Miyerkules, Nobiyembre 24.

Sa alas 4:00 sa hapon, ang case bulletin sa Sabado, Nobiyembre 27, ang DOH nitala og 899 ka bag-ong Covid-19 cases sa nasod. Kini nihatod sa kinatibuk-ang caseload ngadto sa 2,831,177 diin ang 17,052 ang active cases. (SunStar Philippines)